Արցախի անվտանգության խորհրդի քարտուղար Վիտալի Բալասանյանը երեկ ադրբեջանցի պաշտոնատար անձանց հետ շրջել է Բերձորում ու ցույց տվել առաջիկա օրերին ադրբեջանցիներին հանձնվող բերձորցիների տները: Այս մասին Aravot.am-ին պատմեց Բերձորի բնակիչ Սաթիկ Ասատրյանը:
Ըստ նրա՝ բնակիչներով գյուղի կենտրոնում հավաքված էին, մեկ էլ տեսնում են՝ Վիտալի Բալասանյանը գալիս է ադրբեջանցի գեներալների հետ․ «Ընդ որում՝ առաջին անգամ չէ, որ նա թուրքերի հետ հանգիստ շրջում է, մենք Շուշիի պոստերում էլ ենք տեսել, թե ինչպես է քաղցր-քաղցր զրուցում դրանց հետ»։
Սաթիկ Ասատրյան
«Ադրբեջանցիներն արդեն եկել՝ մեր տներն էին նայում: Վիտալին ցույց էր տալիս մեր տները՝ հավաստիացնելով, որ մենք չենք քանդում, չենք ավերում, նորմալ է ամեն ինչ: Պատկերացնում ենք՝ ինչ եղավ մեր վիճակը, որ նայում էինք այդ ամենին: Մեր բնակիչներից մի շատ համարձակ կին մոտեցավ Վիտալիին ու ասաց՝ մեր հողերը սաղ ծախեցիք, քիչ է, հրահանգել ես ժողովրդին, որ մի չոփ վնաս չտան, ինչի՞ համար: Մարդիկ տարիներով ապրել են, ստեղծել են, դուք ասում եք՝ բանալիներով կփակեք, կբերեք կտաք, ղեկավարներին: Ի՞նչ է, մեզ էլ Լաչինի հե՞տ եք վաճառել: Վիտալին ապշած մեզ էր նայում, հետո նստեցին ավտոն ու թռան: Կարելի՞ է նման բան անել»,- սրտնեղեց Սաթիկ Ասատրյանը:
Այս տեղեկությունը փորձեցինք ճշտել Վիտալի Բալասանյանից, սակայն նա չպատասխանեց մեր հեռախոսազանգերին, ինչպես նաեւ գրավոր հարցմանը:
Կարդացեք նաև
Նարեկ Ալեքսանյանի լուսանկարը՝ «168 ժամի»
Տեղեկությունը ճշտեցինք Բերձորի քաղաքապետ Նարեկ Ալեքսանյանից:
«Տներ ցույց տալ կամ ինչ-որ նմանատիպ բան չի եղել: Կանգ առ եղել է Բերձորում, Վիտալի Բալասանյանը եղել է ադրբեջանցի պաշտոնյաների հետ, եղել են ռուս հրամանատարներ իրենց հետ: Մի պահ կանգնել են, զրուցել տեղի ռուս պատասխանատուների հետ ու շարժվել»,- ասաց Նարեկ Ալեքսանյանը:
Արփինե ՍԻՄՈՆՅԱՆ
Հ․ Գ․ Արցախի ԱԺ «Արդարություն» խմբակցության պատգամավոր Կարեն Հովհաննիսյանն իր ֆեյսբուքյան էջում ավելի ուշ գրել է․ «Ի գիտություն ՀՀ լրատվամիջոցների, Բալասանյանը չի շրջել Բերձորով, այլ եռակողմ հանդիպում է եղել ռուսական խաղաղապահի կայանատեղիում, որից հետո գեներալը զրուցել է բերձորցիների հետ, պատասխանել բազում հարցերի, հընթացս սաստելով ադրբեջանցի պաշտոնյային, որը խաղաղապահի հրամանատարության հետ այդ պահին այդտեղ է եղել»։
