Վաղը նշվելու է Հայաստանի կոլորիտային քաղաքներից մեկի՝ Գյումրու տոնը։
Այս տարվա տոնակատարությունը, ի տարբերություն նախորդ տարիների, երբ վերանորոգված փողոցներ կամ կառույցներ էին պաշտոնապես շահագործման հանձնում՝ այսպիսով ցուցադրելով Գյումրիում կատարված փոփոխությունները, վերջին նորույթները, ուղեկցվում է մշակութային միջոցառումներով։
Տոնն ազդարարվելու է զբոսաշրջիկների կողմից ամենաշատ այցելվող Ռուսթավելի պատմական փողոցում «Գյումրի․ վարպետաց քաղաք» արհեստի ու արվեստի տոնավաճառով, այնուհետ համերգային ծրագրեր են լինելու, մրջոցառումներ Ավետիք Իսահակյանի ու Հովհաննես Շիրազի հուշատուն-թանգարանների բակերում։
Քաղաքի պատմական կենտրոնի ճեմափողոցներից մեկում էլ՝ Աբովյանում, կազմակերպվելու է «Art and Craft Souvenires» ցուցահանդես- տոնավաճառը, նույն հասցեում գտնվող Մարիամ և Երանուհի Ասլամազյան քույրերի պատկերասրահում էլ բացվելու է գյումրեցի Լևոն Լաճիկյանի «Գյումրի և Անդին․․» խորագրով գծանկարների ցուցահանդեսը։ Մեկ այլ ցուցահանդես ու պատերագրքի շնորհանդես էլ տեղի է ունենալու Գյումրու քաղաքապետարանի շենքում։
Կարդացեք նաև
Գյումրու օրն ուղեկցվելու է «Երևանի օրերը Գյումրիում» տոնակատարությամբ։ Այս շրջանակում Գյումրու կենտրոնական Վարդանանց հրապարակում մեծ համերգ է լինելու Հայաստանի պետական սիմֆոնիկ նվագախումբի և «Ռեինկարնացիա»-ի մասնակցությամբ։ Համերգը լինելու է հրավիրատոմսերով՝ 1000 աթոռ-նստատեղերով։
Բեմի տեղադրման, համերգի կազմակերպման ծախսերն այս դեպքում Երևանի քաղաքապետարանն է հոգալու։ Նշենք նաև, որ Երևան համայնքը երաժշտական գործիքներ է նվիրաբերելու Գյումրու մանկական փողային նվագախմբին։
Մեր տեղեկություններով, վարչապետ Նիկոլ Փաշինյանը Գյումրու տոնին չի մասնակցելու, կառավարական հյուրերից ներկա է գտնվելու փոխվարչապետ, գյումրեցի Համբարձում Մաթևոսյանը, տարածքային կառավարման և ենթակառուցվածքների նախարար Գնել Սանոսյանը, բնականաբար կհյուրընկալվի Երևանի քաղաքապետ Հրաչ Սարգսյանը, քաղաքապետարանի այլ պաշտոնյաներ։
Հիշեցնենք, որ Գյումրու տոնն ավագանու որոշմամբ նշվում է 8 միլիոն դրամով։
Նունե ԱՐԵՎՇԱՏՅԱՆ
