Ի թիվս այլ համայնքների՝ սեպտեմբերի 25-ին ավագանու համամասնական ընտրակարգով հերթական ընտրություններ են նշանակված նաև Տավուշի մարզի Բերդ խոշորացված համայնքում։ «Զորավոր համայնք» դաշինքի նախընտրակյան ցուցակի առաջին համարը գլխավորող,Բերդ համայնքի ղեկավար Հարություն Մանուչարյանը 2021թ-ի նոյեմբերի 9-ից գտնվում է անազատության մեջ։
Նրան մեղադրանք է առաջադրվել քրեական օրենսգրքի 308-րդ հոդվածի 1-ին («Պաշտոնեական լիազորությունները չարաշահելը) եւ 314-րդ մասին 1-ին մասերի հատկանիշներով («Պաշտոնեական կեղծիքը)։ «Զորավոր համայնք» դաշինքի նախընտրական շտաբի ղեկավար Արամ Նիգոյանը Aravot.am-ի հետ զրույցում նշեց, որ 2 օր է արդեն, ինչ սկսել են քարոզարշավը։
«Քարոզարշավը անցնում է շատ լավ։ Իհարկե դժվար է առանց գլխավոր թեկնածուի, քանի որ նա պետք է ներկայացնի իր խոսքը,տեսակետը,ծրագրերը, կարողանա անմիջական շփվել բնակիչների հետ։ Այդ իսկ պատճառով մենք՝ խոսքի փոխարեն հանրությանն ենք ներկայացնում նրա՝ բազում տարիների աշխատանքը։ Չնայած այս դժվարություններին մեր շանսերը այս ընտրություններում գնահատում եմ շատ բարձր։ Կարծում եմ այս ընտրություններն ավելի շատ անցնելու են զգացմունքային դաշտում»,-նշեց Նիգոյանը։ Վերջինս նաև տեղեկացրեց, որ խոշորացված համայնքի բոլոր վարչական ղեկավարները սատարում են դաշինքին։
«Ուզում եմ նաև շեշտել, որ մենք բոլորս բազմակուսակցական են,բայց դաշինքով համախմբվել ենք մեկ միասնական գաղափարի շուրջ։ Ես՝ ինքս «ԱԻՄ» կուսակցության անդամ եմ դեռևս 1989 թվականից»,-հավելեց մեր զրուցակիցը։
Կարդացեք նաև
Հիշեցնենք, որ Բերդ խոշոր համայնքի ավագանու ընտրություններում «Քաղաքացիական պայմանագիր» կուսակցության նախընտրական ցուցակը գլխավորում է Բերդի միասնական սոցիալական ծառայության տնօրեն Վահրամ Սուքիասյանը, «Արդարություն» կուսակցության եւ «Քաղաքացու որոշում սոցիալ-դեմոկրատական կուսակցության ստեղծած դաշինքի՝ «Արժանապատիվ սերունդի» թեկնածուների ցանկը՝ Աշոտ Մելիքյանը։
Լիա ՃԱՂԱՐՅԱՆ
Լուսանկարը՝ «Զորավոր համայնք» դաշինքի ֆեյսբուքյան էջից
