«Նոր հանդիպեցի, խոսեցի պարոն Ղազարյանի հետ: Ուներ վնասվածքներ: Ակնհայտ անհամաչափ ուժի կիրառմամբ են նրան բերման ենթարկել»,- քիչ առաջ դուրս գալով ՀՀ ոստիկանության Երևան քաղաքի վարչության Նոր Նորքի բաժանմունքից՝ հայտարարեց «Պատիվ ունեմ» խմբակցության պատգամավոր Հայկ Մամիջանյանը։
Նշենք, որ ՀՀ ԱԺ-ի մոտից դիմակավորված ոստիկանները բերման ենթարկեցին «Համախմբում» նախաձեռնության անդամ Էդգար Ղազարյանին՝ Վարչական իրավախախտումների վերաբերյալ օրենսգրքի 182–րդ հոդվածի հիմքով՝ «Զինծառայողների կամ ոստիկանության ծառայողի օրինական պահանջը չկատարելը»։
Նա մասնակցում էր 44-օրյա պատերազմում զոհված զինծառայողների հարազատների ցույցին:
Կարդացեք նաև
Հայկ Մամիջանյանը հայտնեց՝ Էդգար Ղազարյանի նկատմամբ բերման ենթարկելիս կիրառվել են հատուկ միջոցներ՝ ձեռնաշղթաներ: Պատգամավորը նշեց. «Ցավում եմ՝ ռազմական նման իրադրության, զարգացումների պարագայում իշխանություններն ուրիշ բան ու գործ չունեն, քան ընդդիմության նկատմամբ շոուների բեմադրության ցուցումներ տալը: Փաստորեն, Նիկոլ Փաշինյանն այնքան ժամանակ ունի, որ զբաղված է այդ ցուցումները տալով»:
Հայկ Մամիջանյանն ասաց, որ Էդգար Ղազարյանը հակընդդեմ հայց է ներկայացրել ուժի կիրառման հետ կապված:
Այս պահին Նոր նորքի բաժանմունքում են նաև «Հայաստան» խմբակցության պատգամավորներ Ասպրամ Կրպեյանը, Քրիստինե Վարդանյանը: Նրանց ականատեսները պատմել են, որ ոստիկանները սեղմել են Էդգար Ղազարյանի վզին՝ հատուկ կետում, որի պատճառով նա գիտակցությունը կորցրել է, և նրան նստեցրել են մեքենա ու բերման ենթարկել:
Տաթև ՀԱՐՈՒԹՅՈՒՆՅԱՆ
