«Մոսկվա» կինոթատրոնի դիմաց կառուցվող «Կեմպինսկի» հյուրանոցը (կառուցապատողը ԲՀԿ առաջնորդ Գագիկ Ծառուկյանն է), որի շինաշխատանքները դադարեցված էին, նորից թույլտվություն է ստացել։ Այսօր խորհրդարանում լրագրողների հետ ճեպազրույցում քաղաքապետ Հրաչյա Սարգսյանը հաստատեց այս լուրն ու ասաց՝ կառուցապատողը 290 մլն դրամի տուգանք է վճարել՝ խախտումների համար․«Եղել է նախագիծ, որի շրջանակներում առանց հաստատման աշխատանքներ է կատարել։ Իրենք նախագծից ավել աշխատանքներ են իրականացրել, որի համար մենք թույլտվություն չենք տվել։ Հիմա աշխատում են հաստատված նախագծի շրջանակներում։ Այդ նախագիծն անցել է տարբեր գերատեսչություններով, հետո հասել է քաղաքապետարան, ես էլ շինթույլտվություն եմ տվել։ Շենքը կառուցվելու է հետնամասում գտնվող մեկ այլ հյուրանոցի նիշի շրջանակներում, 72 նիշ է հաստատված»։
Քաղաքապետն ասաց, որ մայրաքաղաքում անավարտ բազմաթիվ շինարարություններ կան, որոնք խնդիր են․ «Երեւանի կենտրոնում կիսակառույցներ կան։ Օրինակ՝ Աբովյան-Արամի խաչմերուկում տասը տարուց ավելի է խնդիր կա իրացման հետ կապված, շենքը չի կառուցվում։ Ինչքա՞ն պետք է այդպես մնա ու որոշում չկայացնենք։ Պետք է օպտիմալ լուծումներ տանք, չի կարելի, որ քաղաքի կենտրոնում այդպես մնա։ Պետք է լուծում տանք, անցնենք առաջ»։
Նելլի ԲԱԲԱՅԱՆ
