«Արցախի ՊԲ ձեւավորումը ունի բավականին լուրջ առանձնահատկություններ, որոնք օրինակելի են նույնիսկ արեւմտյան բանակների գործունեության ու զարգացման շրջանակներում. օրինակ՝ տեղային ստորաբաժանումների ձեւավորումը, մարտական գործողությունների ժամանակ բոլոր շրջանների ենթակառույցների ենթակայությունը ռազմական հրամանատարությանը: Երբ ասում են՝ Արցախում կան հայկական ստորաբաժանումներ, Արցախում կան հայկական զորամասեր, դա Արցախի ՊԲ-ն է, Արցախի բանակն է, այնտեղ չկան Հայաստանի զորքեր: Դրա համար, երբ Արցախի ժողովրդի անվտանգության խնդիրները դեռ առաջնային են, ՊԲ-ն իր ողջ ներուժով, Ռուսաստանի խաղաղապահ ուժերի հետ միասին, նաեւ համագործակցելով Հայաստանի հետ, պետք է գոյություն ունենա եւ իր առջեւ դրված խնդիրները կատարի»,- խորհրդարանում լրագրողների հետ զրույցում ասաց պաշտպանության նախկին նախարար Սեյրան Օհանյանն՝ անդրադառնալով Նիկոլ Փաշինյանի այն հայտարարությանը, որ Սոչիում առաջարկը, Ռուսաստանի եւ Ադրբեջանի ղեկավարներին ներկայացրել է Ղարաբաղի իշխանությունների առաջարկը՝ «եթե Արցախի շուրջ ստեղծվի ապառազմականացված գոտի՝ միջազգային երաշխիքներով, ապա նման մասշտաբի պաշտպանության բանակ ունենալու կարիք Ղարաբաղը կարող է եւ չունենալ»:
Նա հիշեցրեց, որ Արցախի ՊԲ-ն ձեւավորվել է ինքնապաշտպանական ջոկատների հիմքի վրա՝ Արցախի ներուժով:
Նելլի ԳՐԻԳՈՐՅԱՆ
