Տավուշի մարզի Բերդ խոշորացված համայնքում այս պահին ընթանում են բազմաթիվ սուբվենցիոն ծրագրեր:
Սահմանապահ 6 բնակավայրում՝ Չինարի, Այգեպար, Մովսես, Պառավաքար, Այգեձոր և Չորաթան գյուղերում կառուցվում է ընդհանուր 40 կմ երկարությամբ գիշերային լուսավորության ցանց: Չինարիում իրականացվում են ոռոգման համակարգի արդիականացման, այդ թվում՝ պոմպակայանի կառուցման աշխատանքներ:
Բերդի համայնքապետ Աստղիկ Հակոբյանն Aravot.am-ի հետ զրույցում նշեց, որ 2023թ-ին նախատեսված սուբվենցիոն ծրագրերից կարեւորում է Վերին Կարմիրաղբյուր, Նորաշեն, Արծվաբերդ բնակավայրերի խմելու ջրի արտաքին ցանցի հիմնանորոգման աշխատանքները, համարելով այն համայնքի կարեւոր հիմնախնդիրներից մեկը: «Եվս մեկ կարևոր նախաձեռնություն է Բերդ քաղաքում «Հերոսների պուրակի» կառուցումը: Ծրագրով նախատեսում ենք հիմնանորոգել Բերդի կենտրոնական զբոսայգին, որը չի նորոգվել խորհրդային տարիներից հետո: Զբոսայգում կկառուցվի շրջանաձև քայլուղի, կտեղադրվեն նստարաններ: Այնուհետև հանրային լսումների միջոցով,մասնագետների ներգրավմամբ կորոշվի ինչպիսի հուշարձան կամ հուշակոթող պետք է տեղադրվի զբոսայգում` ի հիշատակ 44-օրյա պատերազմում զոհվածների: Սուբվենցիոն ծրագրով կբարեկարգվի ևս 2 զբոսայգի»,-նշեց Աստղիկ Հակոբյանը:
Կարդացեք նաև
Լիա ՃԱՂԱՐՅԱՆ
Լուսանկարը` Բերդի համայնքապետարանի
