Երեւան քաղաքի ընդհանուր իրավասության դատարանի Ավան եւ Նոր Նորք նստավայրում, այսօր դատավոր Վահե Միսակյանի նախագահությամբ շարունակվեց «դիզվառելիքի գործով» դատական նիստը: Դատարանը շարունակում է հարցաքննել վկաներին: Այսօր հարցաքննվեց «Կամո Օյլ» ՍՊԸ-ի տնօրեն եւ սեփականատեր Կամո Մելքոնյանը: Ընկերությունը 2000 թվականից զբաղվել է Իրանից դիզվառելիքի ներկրումներով: Կամո Մելքոնյանը պատմեց, որ շատ մտերիմ հարաբերությունների մեջ է եղել «MAX ՕՅԼ» ՍՊԸ ընկերության տնօրեն Խաչիկ Մանուկյանի հետ: Վիճարկվող հարցի մասով էլ պատմեց, որ Խաչիկ Մանուկյանն իրեն ասել է, որ ցանկանում է մրցույթի մասնակցել եւ հետաքրքրվել է, թե ինքն իր ընկերության միջոցներով ի՞նչ կարող է բերել եւ ի՞նչ պայմաններով: Նա ներկայացրել է, ապա Խաչիկ Մանուկյանը հարցրել է՝ վստա՞հ լինեմ, պատասխանել է՝ վստահ եղիր:
«Մրցույթը, իր ասելով, շահել է ինքը՝ Խաչիկ Մանուկյանը, «MAX ՕՅԼ» ՍՊԸ-ն, սենց ասեմ: Ինքը ասեց՝ կարո՞ղ ես, մեքենաներով-բանով օգնես, որ մրցույթին մասնակցեմ, շատ մեծ մրցույթ էր, գյուղատնտեսության մրցույթ, ասացի՝ այո, ինքն էլ համաձայնվեց, որ մասնակցի մրցույթին: Դրանից հետո մրցույթը եղավ, ասեց, որ մրցույթը «MAX ՕՅԼ»-ն է շահել»,- հայտարարեց Կամո Մելքոնյանը՝ հավելելով, որ ավելի հստակ՝ տարեթվերով եւ ամսաթվերով չի կարող ասել: «Բայց հետո, ես իրեն մի հատ բան ասեցի, որ 2010 թվականին էր կարծեմ, կառավարության նոր որոշում է եղել, որ ծծումբի պարունակությունը վառելիքում պետք է լինի 10, իսկ Իրանից բերածը լինում էր բարձր՝ մինչեւ 500,100 այդքան էր լինում: Ես այդ հարցով Խաչիկ Մանուկյանին տեղեկացրի, որ Իրանն այդ ժամանակ այդպիսի վառելիք չի արտադրում»,- հայտարարեց վկան: Վկան պատմեց, որ ԵԱՏՄ-ի շրջանակներում նոր կարգավորումներ էին մտցվել եւ այդ կարգավորումը, որը 2010 թվականից օրենքի ուժ ուներ, երկու տարուց սկսեց կիրառվել: Նա հիշեց, որ այդ ընթացքում ինքը Թուրքմենիայից ապրանք էր բերել, որտեղ ծծմբի պարունակությունը 30 էր, այդ ապրանքը դեկտեմբերի 23-ից հունվարի 15-20-ը սահմանին է մնացել, որի համար նաեւ մեծ տուգանքներ է վճարել, մինչեւ կարողացել է թղթերով ապահովել, որ ապրանքը բերվել է օրենքի կիրառումից առաջ: Հետո Խաչիկ Մանուկյանն իրեն ասել է, որ մրցույթը ոչ թե իր ընկերությունն է շահել, այլ «Ֆլեշը»:
Դատախազի հարցին ի պատասխան, Կամո Մելքոնյանը հայտնեց, որ Իրանից եւ Թուրքմենստանից ներկրված դիզելային վառելիքն առ այսօր, իր որակական հատկանիշներով էականորեն զիջում է այլ երկրներից ներկրված վառելիքին, բայցի այդ Իրանում, առ այսօր, ձմեռային դիզվառելիք չեն արտադրում ու հնարավոր չէր ամառային դիզվառելիք ներմուծել՝ ձմեռային գյուղատնտեսական աշխատանքների համար: Նա նաեւ պնդեց, որ «MAX ՕՅԼ» ընկերությունը մինչեւ 2015 թվականը դիզվառելիք չի ներկրել, բենզին է ներկրել, մինչ այդ, իր ղեկավարած ընկերությունը նաեւ «MAX ՕՅԼ»-ի համար է դիզվառելիք ներկրել: Նա նաեւ ասաց, որ ամսական կտրվածքով, առավելագույնը 2000 հազար տոննա վառելիք էր կարող իր ընկերությունը ներկրել. դրա համար նաեւ համապատասխան տեխնիկա ուներ, իսկ պահեստները «MAX ՕՅԼ»-ինն էին՝ մինչեւ 2500 տոննա պահեստավորելու հնարավորությամբ:
Դատախազը պնդեց, որ վկայի նախաքննական ցուցմունքն այլ է: Վկան հայտարարեց, որ ինքը շատ բան չի հիշում, երկար ժամանակ է անցել, այդ մասին նաեւ քննիչին է ասել, հետո, նրա հարցերից ելնելով, ինչ-որ վերհիշել է՝ ասել է: Դատախազը պնդեց, որ թեեւ վկան այժմ պնդում է, որ իր ընկերությունը ծրագրին անմիջական մասնակցություն չի ունեցել, նախաքննական ցուցմունքում ասել է մասնակցության մասին՝ եւ իր խոսքում, ոչ թե քննիչի հարցադրումներին ի պատասխան, հայտնել է տեղեկություններ, որոնք ոչ թե Խաչիկ Մանուկյանից է ստացել, այլ գործընթացին անձամբ է մասնակցել: Վկան էլ ասաց, որ Խաչիկ Մանուկյանից է տեղեկությունները ստացել եւ ինչ-որ գիտի՝ ասել է եւ որեւէ մեկի հետ որեւէ պայմանավորվածություն չունի, որ փոխի ցուցմունքները: Վկան հայտարարեց, որ գյուղատնտեսության նախարարություն որեւէ փաստաթուղթ չի ներկայացրել, քանի որ «MAX ՕՅԼ» ընկերության անունից չէր կարող դա անել, իսկ «Կամո ՕՅԼ»-ին մրցույթին չի մասնակցել:
Դատախազը հետաքրքրվեց՝ 2019 թվականի հոկտեմբերի 19-ին, առաջին հարցաքննության ժամանակ հայտնել է 2009 թվականից սկսած իրադարձությունների վերաբերյալ տեղեկություններ, բայց հիմա դատարանում ասում է, որ չի հիշում մրցույթի հետ կապված հարցերը. ինչպե՞ս: Վկան հայտարարեց, որ առաջին օրը ցուցմունք չի տվել, գնացել եւ «MAX ՕՅԼ» ընկերության հաշվապահին խնդրել է նախկին գործունեություն մասին որոշ փաստաթղթեր իրեն տրամադրի, որ վերհիշի: Դատախազն էլ տարակուսեց՝ եթե վկան «MAX ՕՅԼ» ընկերության հետ կապ չի ունեցել, ինչո՞ւ է այդ ընկերության հաշվապահին դիմել: «Բա որտեղի՞ց վերհիշեի»,- հակադարձեց վկան, հետո ասելով, որ նախաքննության ժամանակ հայտնած իր տեղեկությունները այդտեղից է վերցրել, բայց այժմ դրանք էլ չի հիշում. «Ես չեմ հիշում՝ ինչ եմ ասել, հիմա էլ որ կրկնեմ»:
Կարդացեք նաև
Մանրամասները՝ քիչ ուշ՝ տեսանյութում
Դատարանն էլ արձանագրեց, որ վկայի նախաքննական եւ դատարանում հայտնած ցուցմունքներում էական տարբերություններ կան: Վկան կրկնեց, որ իր ցուցմունքների հակասությունների պատճառը այլ բաներով պայմանավորված չէ, այլ զուտ չհիշելով:
Դատավորը հարցրեց՝ ինչո՞վ է պայմանավորված, որ նախաքննության ընթացքում իր հայտնած մանրամասների մի մասը հիմա վկան չի հիշում, մի մասի հետ կապված էլ տալիս է էականորեն տարբերվող պատասխաններ: «Ինձ հետաքրքրում է՝ ես որ ապրանքը բերում էի, դրա մեջ փող պետք է առնեի, բայց դրանից հետո Խաչիկ Մանուկյանը փող էր առնելու կամ փող չէր առնելու ու ի՞նչ գին էր դրել, դա ինձ էդքան չի հետաքրքրել, որ ես այսօր հիշեմ՝ ասեմ»,- ասաց վկան:
Իսկ հարցին, թե ինչո՞ւ որոշեց դատարանում դիզվառելիքի որակական հատկանիշների, ծծմբի պարունակության մասին խոսել, վկան պատասխանեց. «Օրենքը 2012 թվականից գործել է, չասե՞մ»: Իսկ թե ինչո՞ւ քննիչին չի ասել այդ մասին՝ պատասխանեց, որ չի հիշել եւ պնդեց, որ ինչը երբ հիշել է, ասել է:
Հիշեցնենք, այս գործով ՀՀ երրորդ նախագահ Սերժ Սարգսյանին մեղադրանք է առաջադրված առանձնապես խոշոր չափերով յուրացման/վատնման համար․ ըստ մեղադրանքի, նրա կազմակերպմամբ եւ «Ֆլեշ» ընկերության սեփականատեր Բարսեղ Բեգլարյանի դրդմամբ՝ 2013թ․ հունվարից մինչեւ փետրվարը կառավարության պահուստային ֆոնդից վատնվել է պետական աջակցության ծրագրերի իրականացման ընթացքում 15 391 765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489 160 310 ՀՀ դրամ: Այս գործով մեղադրյալի կարգավիճակում էին նաեւ ՀՀ գյուղատնտեսության նախկին նախարար Սերգո Կարապետյանն ու նրա տեղակալ Սամվել Գալստյանը, որոնց նկատմամբ քրեական հետապնդումը դադարեցվել էր․ նախկին պաշտոնյաները մահացել էին կորոնավիրուսից։
Նելլի ԳՐԻԳՈՐՅԱՆ
