Արդարադատության նախարար Գրիգոր Մինասյանը խորհրդարանում լրագրողների հետ ճեպազրույցում անդրադարձավ հարցին, թե արդա՞ր է, երբ վարչապետի ավտոշարասյան վթարի գործով որեւէ մեկը կալանավորված չէ, իսկ վարչապետի որդու ենթադրաբար առեւանգման գործով կալանավորված կա։
«Իմ կարծիքով՝ արդար ու ճիշտ է, որ մենք դատարանի եւ կոնկրետ դատավորի որոշումները չքննարկենք, վստահենք մեր դատարաններին։ Գործի հանգամանքներից, նրբություններից ելնելով՝ դատավորն իր ներքին համոզմունքով է այդ որոշմանը գալիս։ Եվ, իմ պատկերացմամբ, երբ խոսվում է դատարանի նկատմամբ ճնշումների մասին, մենք պետք է ընկալենք, որ երբ լրագրողական համայնքը, կամ ես այստեղ կանգնած, կամ տուժող կողմի ներկայացուցիչները, երբ հորդորում են, կոչեր են անում, նման քայլերով միգուցե դատարանին կոնկրետ գործով կաշկանդվածության մեջ կարող են դնել»,- ասաց նա։
Գրիգոր Մինասյանը հավելեց, որ նույնիսկ ժողովրդավարական երկրներում կարող են լինել դժբախտ պատահարներ, ինչպես վարչապետի ավտոշարասյան մասնակցությամբ դեպքը։ «Ես գնահատական չեմ ուզում տալ կոնկրետ այդ դեպքի հետ կապված, բայց որպես սոցիալական ցանցերից այդ դեպքին ծանոթացած մարդ, ես տեսել եմ դժբախտ պատահար։ Իսկ արդար է, թե՞ ոչ, պետք է սպասենք օրինական ուժի մեջ մտած դատական ակտին, տեսնենք։ Պետք է տեսնենք վերջում օրինական ուժի մտած վճիռ, նոր գնահատական տանք»,- հավելեց Մինասյանը։
Ռոզա ՀՈՎՀԱՆՆԻՍՅԱՆ
