Օգոստոսի 3-ին Կոռնիձոր այցելած Հայաստանում ՄԱԿ-ի գրասենյակի ներկայացուցիչներին Հայաստանի արտաքին գործերի նախարարության ներկայացուցիչներն ու Սյունիքի մարզպետի տեղակալ Հայկ Հարությունյանը ներկայացրել են ստեղծված իրավիճակը։
Նշենք, որ արդեն 9-րդ օրն է, ինչ Հայաստանից Արցախ ուղարկվող հումանիտար օգնությամբ 19 բեռնատարները կանգնած են Կոռնիձորում։ Երեկ այս բեռանատարներին միացան նաեւ «Գրանդ Քենդի»-ի երկու բեռնատարները։
Հայաստանում ՄԱԿ-ի մշտական համակարգողի պաշտոնակատար Նաննա Սկաուն կարդաց ՄԱԿ-ի գլխավոր քարտուղար Անտոնիո Գուտերեշի հայտարարությունը։ Գուտերեշը կոչ է արել կատարել ՄԱԿ-ի դատարանի որոշումներն ու ապաշրջափակել Լաչինի միջանցքը։ Տիկին Սկաունը հույս հայտնեց, այս հայտարարությունը դրական արդյունքների կհանգեցնի։
Իսկ արդեն Գորիսում դիմելով նրանց՝ Սյունիքի մարզպետի տեղակալ Հայկ Հարությունյանը մասնավորապես նշեց, որ միջազգային գործընկերների այցը Կոռնիձոր փաստում է, որ մինչեւ օրս գործադրված ջանքերը բավական չեն։
Կարդացեք նաև
«Եվ վստահ եմ, որ այսօրվա ձեր բոլոր դիտարկումները ավելի օբյեկտիվ պատկերացում կտան ձեզ՝ առկա վիճակը ճիշտ ներկայացնելու, եւ կանխելու հումանիտար այս ճգնաժամը, որ միտում ունի անդառնալի աղետի վերածվելու»,-ասաց Հայկ Հարությունյանը։
Սյունիքի մարզպետի տեղակալի խոսքով՝ դժվար է պատկերացնել, որ 21-րդ դարում մենք կհանդիպենք մի խոսույթի, որն Ադրբեջանն է առաջ քաշում։ «Դա, այսպես կոչված, ինտեգրումն է՝ սովամահության ճանապարհով։ Օրեր առաջ, երբ բեռները շարժվում էին Սյունիք, սյունեցիները հավատում էին, որ Լեռնային Ղարաբաղում ապրող իրենց քույրերն ու եղբայրները կարժանանան մարդասիրական վերաբերմունքի, եւ կստանան այն»,-նշեց Հայկ Հարությունյանը՝ ավելացնելով, որ ոչ մեկը չի կարող պատկերացնել սահմանից այն կողմ գտնվող մարդկանց վիճակը։
Արմեն ԴԱՎԹՅԱՆ
