ԱՄՆ–ում բնակվող լրագրող Արթուր Սահակյանը տեսանյութեր է հրապարակել, թե ինչպես են Միացյալ Նահանգներում մեր հայրենակիցները բողոքի ցույցեր, ավտոերթ եւ նստացույց անում՝ ի պաշտպանություն Արցախի: Մասնավորապես նման ցույց է տեղի ունեցել Բրբանքում՝ կոնգրեսական Ադամ Շիֆի գրասենյակի դիմաց: Մեր հայրենակիցները նրան ներկայացրել են իրենց պահանջները:
«Պետք է այստեղի քաղաքական գործիչներին հասկացնել, որ մեզ խոստումներ են տվել տարիների ընթացքում, ինչի համար իրենց ընտրել ենք, ու հիմա ժամանակն է՝ այդ խոստումները կատարելու: Այսօր այնպիսի օրհասական վիճակ է, որ չգիտենք՝ վաղը Արցախը կլինի, թե ոչ»,-ասաց ցուցարարներից մեկը:
Պահանջներից մեկն այն է, որ մինչեւ սեպտեմբերի 15-ը Ադամ Շիֆը գնա Հայաստան, ապա Արցախ եւ հանրորեն տեղեկացնի Արցախի ինքնորոշման իրավունքի մասին:
«Ժամը 3-ից հարյուրավոր մեր հայրենակիցներ դուրս են եկել ավտոերթի, որը շարունակվել է Գլենդելով, վերջնակետը եղել է Ադամ Շիֆի գրասենյակը: Մեր հայրենակիցների պահանջն է, որ Ադամ Շիֆը խոստանա, որ պատվիրակություն կկազմի եւ կմեկնի Արցախ, Լաչինի միջանցք, բոլոր հնարավորությունները կօգտագործվեն այն բացելու համար, նաեւ հայրենի վարչակազմի հետ իր կապերը կօգտագործի»,-հավելեց Արթուր Սահակյանը:
Կարդացեք նաև
Բողոքի ցույցերին մասնակցում է նաեւ Պարգեւ սրբազանը: «Ես մի բանի եմ հավատում՝ հաջողության հասնում է նա, ով պայքարում է… Եթե չպայքարենք Արցախի ժողովրդի իրավունքների ու անկախության համար, ոչնչի չենք հասնի: Այսօր ցեղասպանություն է կատարվում, եւ մենք պետք է պայքարենք»,-ասաց նա:
Սրբազանի խոսքով, լավ կլիներ, որ աշխարհի տարբեր անկյուններում բոլոր հայերը ցույցեր անեին ու դռներ բախեին: «Մեր Արցախի ժողովուրդը չպետք է միայնակ զգա»,-ասաց սրբազանը:
Պատրաստեց Գոհար ՀԱԿՈԲՅԱՆԸ
