ՄԱԿ-ի Անվտանգության խորհրդի նիստում քննարկվեց Արցախի շրջափակման հարցը: Lուրջ աշխարհաքաղաքական մարտահրավերների ֆոնին վարչապետ Նիկոլ Փաշինյանը հանրությանը կերակրում է Հայաստանի կադաստրի վկայականը հանելու խոստումներով:
Այս մասին հարցին՝ ինչո՞ւ է այս խոսույթներով ժամանակ ձգում, դիտավորյա՞լ է անում, ծրագի՞ր է իրականացվում՝ Aravot.am-ի «Կարմիր գիծ» հաղորդմանը Հայաստանի արտաքին գործերի նախկին փոխնախարար Արտակ Ապիտոնյանը պատասխանեց. «Ժամանակ ձգելը կարող էր իմաստ ունենալ միայն մի պարագայում, երբ այդ ընթացքում մենք ուժեղանում ենք, ուժեղացնում ենք մեր բանակցային դիրքերը, ուժեղացնում ենք մեր դիրքերն ընդհանրապես: Երբ այդ ուղղությամբ աշխատանք է տարվում: Շատ դեպքերում այդ ուժեղացումը պետք չի հանրային անել, բայց մյուս կողմից դա չի նշանակում, որ խոսույթը պետք է հանրայինում թուլացնել այն աստիճան, որ հետագայում հնարավոր չլինի հետքայլ անել: Հայաստանում ներքաղաքական քննարկումներում ասել, հետո խոսքից հրաժարվելը կարծես ընդունված բան է, բայց պետք չի խառնել միջազգային հարաբերությունները ներքաղաքական խնդիրների հետ: Ասված խոսքերը, ասված խոստումները, ասված զիջումները արդեն հանդիսանում են «fait accompli», այսինքն՝ կատարված փաստ: Տեսեք, հայտարարել են Ադրբեջանի տարածքային ամբողջականությունը ներառյալ Արցախը ճանաչելու մասին։ Ադրբեջանի ներկայացուցիչը ՄԱԿ-ում ասում է՝ դե, արդեն հայտարարել եք, հետեւաբար… Այսինքն, նույնիսկ երբ որեւէ բան ստորագրված չի, միայն հայտարարություն է, դա արդեն օգտագործելու փաստ է: Եվ Ադրբեջանի ներկայացուցիչը եւ մի քանի այլ երկրներ ՄԱԿ-ում ասում էին՝ դե, քանի որ հայտարարել եք, հետեւաբար եկեք տեր կանգնեք ձեր հայտարարությանը»:
Հռիփսիմե ՋԵԲԵՋՅԱՆ
