Առավոտյան ժամը 8:00-ի դրությամբ Լեռնային Ղարաբաղից բռնի տեղահանված 42, 500 անձ է հատել Հայաստանի սահմանը, որից 22,800-ն արդեն հաշվառվել է։ Այս մասին այսօր կառավարության հումանիտար կենտրոնում հրավիրված ասուլիսում ասաց վարչապետի խոսնակ Նազելի Բաղդասարյանը։ Նրա խոսքով՝ Կոռինիձորի կայանը հատելուց հետո բռնի տեղահանվածները հաշվառում են ստանում կամ Գորիսի կամ Վայքի հատուկ հաշվառման կենտրոններում, որից հետո տեղի է ունենում տեղաբաշխումը։
Բաղդասարյանի ներկայացրած տվյալներով՝ 4002 անձ օգտվել է պետության տրամադրած կացարաններից․ «Սա մեզ համար գերնպատակ է՝ ԼՂ հայերին ապահովել որոշակի կացարանով եւ այնուհետեւ կտրամադրվեն այլ բնակության վայրեր։ Պետք է ընդգծել, որ 42, 500-ից 4002-ն է ցանկացել օգտվել այս աջակցությունից»։
Լեռնային Ղարաբաղից բռնի տեղահանված քաղաքացիներից 1465-ը կացարանով ապահովվել են Սյունիքում, Վայոց ձորում՝ 810, Գեղարքունիքում՝ 976, Տավուշում՝ 298, Արմավիրում՝ 200, Արագածոտնում՝ 30, Շիրակում՝ 203, Կոտայքում՝ 20։
«Մնացած քաղաքացիները ցանկացել են իրենց կեցության հարցերը ինքնուրույն կազմակերպել, բայց սա բնավ չի նշանակում, որ պետությունը հետագա հոգածությունից հրաժարվում է»,-հավաստիացրեց Բաղդասարյանը։
Կարդացեք նաև
Նելլի ԲԱԲԱՅԱՆ
