«Մենք ի՞նչ քաղաքական նպատակ ունենք Եվրամիության հետ համագործակցության առումով։ Եվ արդյոք իրենք ունե՞ն մեզանից ակնկալիք՝ մեր մոտեցումներում աշխարհաքաղաքական փոփոխությունների տեսանկյունից»,- այսօր ԱԺ մշտական հանձնաժողովների նիստում 2024 թվականի բյուջեի նախագծի քննարկման ժամանակ Արտաքին գործերի նախարարի տեղակալ Պարույր Հովհաննիսյանին հարցրեց «Հայաստան» խմբակցության պատգամավոր Արմեն Գեւորգյանը։
Պարույր Հովհաննիսյանն ասաց․ «Մեր նպատակն է հնարավորինս զարգացնել հարաբերությունները ու գործընկերությունը Եվրամիության եւ անդամ երկրների հետ։ Դա քաղաքական նպատակ է, եւ դրա համար կա համապատասխան գործողությունների ծրագիրը։ Նույն Վրաստանի դեպքում անդամակցության որոշումը պետք է լինի տարվա վերջին, սպասենք եւ կտեսնենք ինչպես այդ գործընթացը կավարտվի։ Կարծում եմ՝ այդ նպատակին ուղղված իր գործողությունները Վրաստանն արել է»։
Եվրոպական ինտեգրման հարցերի մշտական հանձնաժողովի նախագահ Արման Եղոյանն ասաց, որ իր տպավորությամբ Եվրամիությունը Հարավային Կովկասում վարում է համապարփակ հարաբերություններ հաստատելու քաղաքականություն։ Այսինքն՝ փորձում է հարաբերությունները համատեղ զարգացնել տարածաշրջանի երկրների հետ։ «Հիմա դուք բերեցիք Վրաստանի օրինակը, բայց մենք տեսնում ենք, թե հիմա ինչ դժվարությունների առջեւ է կանգնել Վրաստանը՝ իրենց նպատակներին ամբողջությամբ հասնելու ճանապարհին։ Մենք տեսնում ենք՝ Եվրամիության մեր գործընկերները ինչ նախապայմաններ են էլի ու էլի առաջ քաշում։ Ու այդ հարաբերությունների ընթացքից է նաեւ կախված լինելու, թե մենք ինչ հարաբերություններ կարող ենք ունենալ Եվրամիության հետ»,- ասաց Եղոյանը։
Նա հավելեց, որ Արմեն Գեւորգյանի հարցի պատասխանը ներկայում գտնվում է մշակման փուլում։ «Վարչապետը ասաց շատ պարզ, որ մենք պատրաստ ենք այնքան գնալ առաջ, ինչքանով դա հնարավոր կլինի Եվրամիության տեսանկյունից։ Եվ հիմա այս շաբաթների ընթացքում ձեր հարցի պատասխանը ձեւավորվում է, միգուցե մի քանի ամիս հետո կարող ենք ավելի հստակ պատասխան ունենալ»,- ասաց Եղոյանը։
Կարդացեք նաև
Ռոզա ՀՈՎՀԱՆՆԻՍՅԱՆ
