Այսօր ԱԺ նիստում առողջապահության փոխնախարար Լենա Նանուշյանը ներկայացրեց «Բնակչության բժշկական օգնության եւ սպասարկման մասին» օրենքում փոփոխությունների նախագիծը, որով Արցախից եկած բուժաշխատողների համար շարունակական մասնագիտական զարգացման հավաստագիր՝ ՇՄԶ հավաստագրման գործընթացը երկարաձգվում է մինչեւ 2025-ի հունվարի 1-ը: Ըստ գործող կարգավորման, ՀՀ բուժհաստատություններում աշխատելու համար ավագ եւ միջին բուժաշխատողները պետք է ունենան ՇՄԶ, ինչը տրվում է 5 տարվա ընթացքում իրենց մասնակցած տարբեր դասընթացների, կոնֆերանսների ժամանակ կրեդիտների հավաքագրման արդյունքում: Ավագ բուժաշխատողները պետք է ունենան 220 կրեդիտ, դեղագետները՝ 160, միջին բուժաշխատողները՝ 140, դեղագործները՝ 100:
Արցախից բռնի տեղահանված բուժաշխատողները չունեն այդ ՇՄԶ հավաստագիրը, քանի որ Ղարաբաղում չի եղել այդ կարգավորումը:
«Հայաստան» խմբակցության պատգամավոր Գեղամ Նազարյանն առաջարկեց այն արցախցի բուժաշխատողներին, որոնք մարզերում կաշխատեն, պետության կողմից նվեր տալ բնակարան. «Երկու խնդիր կլուծենք՝ ե՛ւ բարձրորակ բուժծառայություն կունենանք, ե՛ւ արցախցիներին կապահովենք բնակարանով»:
Նրա առաջարկը մնաց օդում, փոխնախարարը չարձագանքեց:
Կարդացեք նաև
Հռիփսիմե ՋԵԲԵՋՅԱՆ
