Երեւան քաղաքի առաջին ատյանի քաղաքացիական դատարանում կայացավ ունեցավ ռեժիսոր, «Մհեր Մկրտչյան» արտիստական թատրոնի նախկին գեղարվեստական ղեկավար Մհեր Մկրտչյանի հայցի քննությունը՝ ընդդեմ Երևանի քաղաքապետարանի եւ թատրոնի։ Այս տարվա հունիսին Երևանի քաղաքապետարանը կրճատել էր «Մհեր Մկրտչյան» արտիստական թատրոնի գեղարվեստական ղեկավարի հաստիքը, արդյունքում՝ թատրոնի տնօրենի պաշտոնակատար Մհեր Մկրտչյանին ազատելով աշխատանքից։
Մհեր Մկրտչյանի շահերի ներկայացուցիչ, փաստաբան Աննա Փիլոսյանը պատասխանելով Aravot.am-ի հարցին, ասաց. «Ինչպես հայցադիմում ներկայացնելիս, այնպես էլ ներկայումս՝ քաղաքապետարանի որոշումը գնահատում ենք ոչ իրավաչափ: Իմ գնահատմամբ առհասարակ հիմքեր չեն եղել հաստիքի կրճատման վերաբերյալ, ինչը հաստատվեց նաեւ այսօրվա դատական նիստում»:
Նա նաեւ հավելեց. « Իմ կանխատեսումն այն է, որ մենք գործը հաղթելու ենք եւ հիմնավորվելու է, որ նպատակը ոչ թե ի նպաստ թատրոնի որոշում կայացնելն էր, այլ թատրոնից Մհեր Մկրտչյանին հեռացնելը»:
Նշենք, որ «Մհեր Մկրտչյան» արտիստական թատրոնի ներկայացուցիչ Արամ Կարախանյանը միջնորդել էր նիստը հետաձգել, դատարանը բավարարել էր նրա միջնորդությունը: Հաջորդ դատական նիստը նշանակել է դեկտեմբերի 8-ին ժամը 11:00-ին։
Կարդացեք նաև
Ինչ վերաբերվում է Մհեր Մկրտչյանին, նա իր ֆեյսբուքի էջում գրել էր. «Քաղաքապետարանի ու «Մհեր Մկրտչյան» թատրոնի դեմ ՝ իմ դատական հայցի առաջին նիստն էր այսօր: Արել եմ ամեն ինչ, որ պրոցեսը չհանրայնացվի, լրագրողներ չկային: Անցավ զուսպ, հանգիստ, հետաքրքիր, մեծ ներքին կուլտուրայի դրսևորումներով:
Հ.Գ. Մարդկանց գործից հանելուց սիրուն արեք, որ ձեր փաստաբանները անհարմար վիճակի մեջ չհայտնվեն` ձեր մարդկային ցանկությունը տրամաբանությունից ու օրենքից առավել մի կարեւորեք»:
Գոհար ՀԱԿՈԲՅԱՆ
