Երեւանի ավագանու «Մայր Հայաստան» դաշինք խմբակցությունից Սամվել Հակոբյանը հայտարարել էր, որ դիմել է դատարան՝ վիճարկում է Երեւանի քաղաքապետ Տիգրան Ավինյանի երդմնակալության արարողության նիստի իրավազորությունը։
Այսօրվա նիստում Հակոբյանը հայտարարեց, որ դատարանը հայցը վերադարձրել է։
Հակոբյանն ասաց, որ կազմակերպչական վարչությանը երեք հարցում է ուղարկել, առաջին պատասխանը ստացել է, մյուսներինը՝ ոչ․ «Հարցումս վարչական դատարան հայցադիմումիս մասին է։ Խնդրում էի ինձ ներկայացնել լիարժեք արձանագրությունը երդման արարողության նիստից։ Խնդրել եմ նաեւ ներկայացնել ձեզանից առաջ եղած երեք քաղաքապետերի երդմնակալության արարողության նիստերի արձանագրությունը, որը ծանրակշիռ ապացույց կլիներ դատական գործում։ Ակնհայտ է, որ նախորդ երեքում քվորում եղել է։ Իմ դատական հայցը երեկ վերադարձվել է ինձ, դատավորը հիմքում դրել է այն հանգամանքը, որ ես չեմ կարողանում ապացուցել, որ ես Տիգրան Ավինյանին եթե դիմեմ նոր երդմնակալության արարողության նիստ անցկացնելու համար՝ հնարավոր է, որ դուք չմերժեք։ Ես գիտեմ, որ դուք կմերժեք, դուք էլ գիտեք, որ կմերժեք։ Դատական գործի լիարժեքության համար նորից հարցում կուղարկեմ։ Խնդրում եմ հետեւողական լինել, պետք է մերժեք, ֆորմալ առումով ինձ անհրաժեշտ է թուղթը, պետք է մտնեմ դատարան։ Ի՞նչ անեմ, որ օպերատիվ պատասխան ստանամ, որ նորից մտնեմ դատարան»։
Համապատասխան վարչության ներկայացուցիչը պարզաբանեց ընթացակարգը։
Կարդացեք նաև
Քաղաքապետ Տիգրան Ավինյանն էլ հավելեց․ «Պարոն Հակոբյան, շնորհակալ եմ, որ չեք խնդրում մեզ աջակցել ձեր դատական հայցի ձեւավորման հարցում»։
Մանրամասն՝ տեսանյութում
Նելլի ԲԱԲԱՅԱՆ
