Aravot.am-ի տեղեկություններով՝ իրավապահներին օպերատիվ տեղեկություններ են հասել ՀՀ կառավարության 1997 թ. հունիսի 3-ի թիվ 165 որոշման հիման վրա 1905.3 քմ մակերեսով և 10.763.415 դրամ հաշվեկշռային արժեքով Բյուրեղավանի թիվ 2-րդ մանկապարտեզի ապօրինի մասնավորեցման գործընթացի վերաբերյալ:
Կառավարության որոշմամբ՝ մանկապարտեզի շենքը «Տնաշինություն» ՓԲ ընկերության կազմից առանձնացվել և սեփականության իրավունքով Կոտայքի մարզի Բյուրեղավանի քաղաքային համայնքին էր հանձնվել, ինչից հետո նույն համայնքի այդ տարիներին ղեկավար հանդիսացած Շավարշ Սեդրակյանը, նախնական տեղեկություններով, հափշտակություն կատարելու դիտավորությամբ, օգտագործելով համայնքի գույքի նկատմամբ տնօրինման, տիրապետման և օգտագործման լիազորությունները, համայնքապետարանի իրավասու պաշտոնատար անձանց հետ նախնական համաձայնությամբ փաստացի չկայացած աճուրդի վերաբերյալ քաղաքապետարանի արձանագրությունների մեջ անձնական այլ դրդումներով կեղծ տեղեկություններ են մտցրել Թ. Մ.-ի՝ աճուրդի մասնակից հանդիսանալու, խառը ապրանքների առևտուր կազմակերպելու համար նրա կողմից տարածքը գնել ցանկանալու մեկնարկային գնի չափով վճարում կատարելու պատրաստակամություն հայտնելու և այլնի վերաբերյալ:
Ինչի հիման վրա կազմված իրավաբանական նշանակություն ունեցող իրադարձություններ հավաստող, գույքն աճուրդով վաճառելու մասին 2005 թ. հունիսի 14-ին արձանագրությունը ներկայացվել է աճուրդային հանձնաժողովի ստորագրմանը եւ համայնքային սեփականություն հանդիսացող տվյալ պահին 29.000.000 դրամ շուկայական արժեք կազմող 957.2 քմ մակերեսով գույքը, անշարժ գույքի աճուրդ-վաճառքի 2005թ. հունիսի 20-ին պայմանագրով ընդամենը 3.445.952 դրամ գումարով օտարվել է իբր աճուրդի հաղթող Ա. Վ.-ին: Այդ կերպ իր ծառայողական լիազորություններն ու դրանցով պայմանավորված ազդեցությունն օգտագործելով՝ համայնքի նախկին ղեկավարը համայնքին զրկել է սեփական գույքը տնօրինելու, տիրապետելու ու օգտագործելու հնարավորությունից և վատնման եղանակով հափշտակել է առանձնապես խոշոր չափերի 25.554.045 դրամ արժողությամբ գույքը:
Մեր տեղեկություններով՝ այս գործը գտնվում է Հակակոռուպցիոն կոմիտեում:
