ԱԺ պաշտպանության եւ անվտանգության հարցերի հանձնաժողովի անդամ, ՔՊ խմբակցության պատգամավոր Գագիկ Մելքոնյանին այսօր լրագրողները հարցրեցին՝ եթե Ուկրաինայի նախագահ Վոլոդիմիր Զելենսկին գա Հայաստան, դա խնդիրներ չի՞ ստեղծի մեզ համար: Նա պատասխանեց. «Եթե որոշի գա, ուրեմն պիտի ընդունենք, ի՞նչ խնդիր ունենք մենք: Մեզ չի հետաքրքրում, թե Ռուսաստանը ոնց կարձագանքի-չի արձագանքի՝ իր գործն է: Մեզ մեր երկրի շահերն են հետաքրքրում, մեր երկրի շահերը ոնց թելադրում է, այնպես էլ պիտի առաջնորդվենք: Մեր երկրի շահը թելադրում է մեզ այն, ինչ պիտի անենք»:
Հարցին՝ ձեզ չի՞ հուզում, որ Զելենսկին 44-օրյա պատերազմի հաղթանակի առթիվ շնորհավորում էր Ալիեւին, զենք է տվել Ադրբեջանին՝ Մելքոնյանը պատասխանեց. «Դուք կարո՞ղ եք ապացուցել, որ դա Ուկրաինան էր տվել: Չենք կարա ասենք, իրենք էլ ասում են՝ այդ զենքը եկել է Ռուսաստանից: Մենք ոչ այնտեղից ունենք հաստատ հիմքեր, ոչ այնտեղից»:
Անդրադառնալով ՀԱՊԿ-ում Հայաստանի անդամակցությունը սառեցնելուն ու Լուկաշենկոյի խորհրդին՝ չշտապել, Մելքոնյանը պատասխանեց. «Լուկաշենկոն շատ բաներ է ասել, հիմնական նրա խոսույթը եղել է այն, որ Հայաստանը ո՞ւր պիտի փախնի, չեք մոռացել, չէ՞, իր խոսքերը: Դե հիմա ինքը ճորտի կարգավիճակով ապրում է՝ այդ երկիրը, մենք չենք ուզում ճորտի կարգավիճակով ապրենք, ուզում ենք դառնանք անկախ երկիր, ում հետ ուզենանք՝ հանդիպենք, պայմանագրեր կնքենք եւ այլն»:
Ըստ Մելքոնյանի, նախկինում մենք անկախ չենք եղել, կախված ենք եղել Ռուսաստանից: Հարցին՝ ձեր տրամաբանությամբ, մենք Ռուսաստանի ճո՞րտն էինք, նա պատասխանեց. «Այո, որովհետեւ ՌԴ-ն էր մեզ թելադրում ամեն ինչ՝ որ երկրի հետ հանդիպենք, շփվենք մեր նախարարները ով պիտի նշանակվի, մեր երկրում ով պիտի լինի նախագահ: Ով «դաբրո» ունենար ՌԴ-ից, նշանակվում էր, որ…»: Հարցին՝ ձեզ ՌԴ-ի «դաբրոյո՞վ» էին նշանակել ՊՆ փոխնախարար, նա պատասխանեց. «Պաշտպանության փոխնախարար իրենց «դաբրոյով» չէր նշանակվում: Ինչի՞ ես ծանր տանում, աղջիկ ջան, որ ասում ենք՝ «դաբրոյով» էր: Մեր նախարարին նշանակում էր ՌԴ-ն: ՊՆ նախարարը նշանակվել է ՌԴ-ի դաբրոյով»:
Կարդացեք նաև
Թե ո՞ր նախարարն է նշանակվել այդպես, պատասխանեց համարյա բոլորը, իսկ հիմա դարձել ենք անկախ ու մենք ենք նշանակում. «Օրինակ, Արշակ Կարապետյանը ՌԴ-ի ցուցումով է նշանակվել ՊՆ նախարար»:
Հռիփսիմե ՋԵԲԵՋՅԱՆ
Լուսանկարը՝ արխիվային
