«Այս պահին ինչ սակագներ գոյություն ունեն, դրա վերաբերյալ թանկացման օրակարգ այս պահին չկա»,-ՀՀ ԱԺ մուտք գործելիս Երևանի ավագանու ընդդիմադիր խմբակցությունների անդամների հարցերին ի պատասխան` ասաց ՀՀ ԱԺ ՔՊ խմբակցության պատգամավոր Թագուհի Ղազարյանը։
Այսօր վաղ առավոտից Երևանի ավագանու ընդդիմադիր խմբակցությունների անդամները ՀՀ խորհրդարանի դիմաց բողոքի ցույց էին իրականացնում՝ ընդդեմ ՀՀ ԱԺ-ի քննարկելիք օրենքի նախագծի, ըստ որի՝ նախատեսվում է նաև 10000 դրամ տուգանք տրանսպորտի ուղեվարձի գումարը չվճարելու դեպքում։
Այս պահին Նիկոլ Փաշինյանը խորհրդարանում ներկայացնում է կառավարության 2021-2026 թվականների ծրագրի՝ 2024 թվականի ծրագրի կատարման ընթացքը։
Կարդացեք նաև
Ավագանու անդամները Թագուհի Ղազարյանին հարցրին՝ Դուք կո՞ղմ եք, թե՞ դեմ թանկացմանը, Դուք կարծում եք՝ քաղաքացին «տուգանքի մատերիա՞լ» է, նա պատասխանեց․ «Ես չեմ կարող կողմ կամ դեմ լինել թանկացմանը։ Քաղաքացին տուգանքի մատերիալ չէ։ Քաղաքացին վճարում է իր տրանսպորտի գումարը և չի տուգանվում»։
Հարցին՝ ո՞նց եք քվեարկելու՝ Ձեր խղճի մտո՞ք, թե՞ ոնց ասի Նիկոլը, ՔՊ-ական պատգամավորը պատասխանեց․ «Խմբակցությունն ունի որոշում, և ես այս որոշումը այս պահին չեմ բարձրաձայնի»։
Երևանի ավագանու «Մայր Հայաստան» խմբակցության անդամ Արշակ Սարգսյանը հարցրեց․ «Դուք գործելու եք Ձեր խղճի մտո՞ք, թե՝ վոսթափով եք որոշում կայացնելու։ Կա՞ դեպք, որ ՔՊ-ն ուրիշ որոշում ունի, Դուք՝ դրանից տարբերվող։ Երբևէ էդ «կնոպկան» սեղմած կա՞ք, քվեարկության ժամանակ հնարավո՞ր է այլ կարծիք ունենաք», Թագուհի Ղազարյանը պատասխանեց․ «Իմ դիրքորոշմամբ ձևավորվում է ՔՊ-ի դիրքորոշումը, որն արտահայտվում է՝ որպես ՔՊ խմբակցության դիրքորոշում։ Դա իմ անձնական որոշումն է, ես եմ ձևավորում ՔՊ խմբակցության դիրքորոշումը»։
Նշենք, որ հիմնականում ՔՊ-ական պատգամավորները խուսափում էին ընդդիմադիր ավագանու ընդդիմադիր անդամների և քաղաքացիների հարցերին պատասխանել։
Տաթև ՀԱՐՈՒԹՅՈՒՆՅԱՆ
