Վերաքննիչ քրեական դատարանում այսօր սկսվեց Արցախի պաշտպանության բանակի նախկին հրամանատար, գեներալ-լեյտենանտ Ջալալ Հարությունյանի դատավճռի դեմ տուժող կողմի ներկայացրած բողոքի քննությունը: Նիստը, սակայն, հետաձգվեց, քանի որ պաշտպանական կողմն էլ իր հերթին էր բողոքներ ներկայացրել: Նիստը նախագահող դատավոր Մխիթար Պապոյանը հայտնեց, որ այսօրվա նիստը կհետաձգվի, քանի որ այսօր կքննարկեն պաշտպանական կողմի ներկայացրած բողոքի՝ վարույթ ընդունելու հարցը: Ըստ Պապոյանի՝ պաշտպանական ու տուժող կողմի բողոքները կնշանակվեն համատեղ քննության:
Հիշեցնենք, որ Սյունիքի մարզի ընդհանուր իրավասության դատարանը՝ դատավոր Գարիկ Աբելյանի նախագահությամբ, մեղավոր էր ճանաչել Ջալալ Հարությունյանին՝ ՀՀ ՔՕ 550-րդ հոդվածի 3-րդ մասով՝ դատապարտել հինգ տարի վեց ամիս ժամկետով ազատազրկման։
Լիպարիտ Սիմոնյան
Տուժող կողմի ներկայացուցիչ Լիպարիտ Սիմոնյանը լրագրողների հետ զրույցում մեկնաբանեց, թե ինչ միտում ունի պաշտպանական կողմի՝ սահմանված ժամկետի վերջին օրով բողոք ներկայացնելը. «Կարծում եմ՝ օգտվել են Քրեական դատավարության օրենսգրքով ընձեռված իրենց իրավունքից: Միտումնավոր կրիչը չեն կցել բողոքին՝ լավ հասկանալով, որ բողոքը վերադարձվելու է ու ժամկետ է տրամադրվելու, որ այդ թերացումը ուղղվի: Այդ հանգամանքը օգտագործելով՝ վերջին օրն են ներկայացրել:
Հաշվի առնելով, որ վաղեմության ժամկետը հոկտեմբերի 12-ին է լրանում եւ հաշվի առնելով, որ կարող է դատավճիռը բողոքարկվել նաեւ Վճռաբեկ դատարանում՝ միտում են ունեցել սպառել ժամանակահատվածը եւ հասնել վաղեմության ժամկետի կիրառման:
Կարդացեք նաև
Այդ միտումը պաշտպանական կողմի մոտ սկսվեց Ջալալ Հարությունյանի նկատմամբ մեղադրական վերդիկտի կայացումից հետո: Վերդիկտի հրապարակումից հետո մի նիստին չեկան, մի նիստին ուշ եկան, այնպիսի գործողություններ, որոնց նպատակն էր նիստերը ձախողել»:
Արփինե ՍԻՄՈՆՅԱՆ
Լուսանկարում՝ Ցորի զորամասի զինվորները
