Այսօր արցախյան շարժման առաջամարտիկ Իգոր Մուրադյանի ծննդյան օրն է: ԱԺԲ խորհրդի անդամները եւ մի խումբ աջակիցներ այցելեցին Եռաբլուր փառքի պանթեոն՝ ոգեկոչելու Իգոր Մուրադյանի հիշատակը:
«Մենք միշտ Իգոր Մուրադյանի ծննդյան օրը գալիս ենք նրա շիրիմին՝ խնկարկելու նրա հիշատակը եւ հանձին իրեն, մեր հարգանքի տուրքը մատուցելու մեր բոլոր զոհվածներին, որ հանգչում են Եռաբլուրում եւ ռազմական գերեզմանոցներում: Սրանով մենք նորոգում ենք մեր ուխտը, պարտավորությունը՝ այս պայքարը շարունակելու, որովհետեւ ամեն կողմից ներշնչում են մեր ժողովրդին, որ պայքարն անիմաստ է, պետք է հանձնվել, պետք է թշնամու ողորմածությանը մնալ: Բայց պատմական փորձը, առավել եւս մեր այսօրվա փորձը ցույց են տալիս, որ մենք հաջողության եւ հաղթանակի ենք հասնում, եթե կա պայքար: Մեր հակառակորդները հաստատ աչքի չեն ընկնում մեր նկատմամբ որեւէ բարյացակամությամբ եւ նրանց նպատակն է՝ մեզ ոչնչացնելը:
Իգորն այն մարդն է, որ մշտապես հավատարիմ է եղել իր սեփական հայացքներին, չի գնացել կյանքի գայթակղության ճանապարհներով: Եվ մենք ուզում ենք հենց նրա կերպարի միջոցով ժողովրդին պայքարը շարունակելու օրինակ բերել»,-Aravot.am-ի հետ զրույցում ասաց ԱԺԲ խորհրդի անդամ Արա Պապյանը:
Հարցին, թե մամուլում լուր տարածվեց, որ Փաշինյանը Տալլինում հանդիպել է Մեծ Բրիտանիայի եւ Թուրքիայի հատուկ ծառայությունների ղեկավարների հետ, Արա Պապյանը պատասխանեց. «Որեւէ դրական ակնկալիք չունեմ: Նախ, պետք է հասկանալ, թե ինչու է վարչապետը հանդիպում ուրիշ երկրների գաղտնի ծառայությունների ներկայացուցիչների հետ, այն էլ՝ Թուրքիայի, որի հետ մենք ընդհանրապես դիվանագիտական հարաբերություններ չունենք: Նման հանդիպումը կարող էր լինել համարժեք ծառայությունների ղեկավարների միջոցով, իհարկե, եթե որոշեն համագործակցել: Մենք համագործակցելու բան էլ չունենք, որովհետեւ մեր շահերը լրիվ հակառակ են: Բրիտանական ծառայության ղեկավար Ռիչարդ Մուրը նախկինում Բրիտանիայի դեսպանն էր Թուրքիայում եւ հայտնի է թուրքական վերնախավի հետ սերտ հարաբերություններով, սերտ կապերով:
Կարդացեք նաև
Ես կարծում եմ՝ ինչ-որ գործարք է ընթանում, որը հակաօրինական եւ հակասահմանադրական է: Ես ինքս բազմաթիվ բանակցությունների մասնակցել եմ: Եթե նպատակ չունեն ինչ-որ գործարք անելու, բանակցությունը անպայման տեղի է ունենում մի քանի հոգու մասնակցությամբ, համապատասխան արձանագրություններով եւ այլն: Սա իր մեջ ինչ-որ դավադրության երանգներ ունի: Սպասենք, տեսնենք: Նիկոլ Փաշինյանից դավադրությունը շատ սպասելի է: Տեսնենք՝ ինչ ենք զիջում, ինչ է ինքը մեր անունից տալիս, ինչ պարտավորություններ է վերցնում: Ինքն անընդհատ ասում է՝ սա չեմ անի, նա չեմ անի, բայց մենք տեսնում ենք, որ ինքը զիջումների գնում է:
Ես այստեղ ուզում եմ մի շատ կարեւոր հանգամանք շեշտել: Նա ինչ անում է՝ հակասահմանադրական է եւ անօրինական: Եվ իր ասածը, թե ես ընտրված եմ, հիմք չի տալիս: Նախ` ընտրությունը խիստ կասկածելի է: Ի վերջո, ընտրությունն ի՞նչ է: Կուսակցությունը հանդես է գալիս իր ծրագրերով, դրա դիմաց ստանում է ժողովրդի քվեն, վստահությունը եւ իրականացնում է ծրագիրը: Եթե տվյալ ծրագրից կա շեղում, կամ ինչ-որ բաներ, դրա համար կարգ կա: Պիտի հրաժարական տաս, նոր ծրագրով գնաս ընտրությունների եւ քվե ստանաս: Ինքը ինչ հիմա անում է, էապես հակասում է 2021 թվականի ՔՊ-ի ծրագրին: Լրիվ հակառակ բաներ է ասել: Հետեւաբար, լինել պաշտոնյա, դեռեւս չի նշանակում՝ լինել այս երկրի եւ ժողովրդի սեփականատերը եւ միանձնյա որոշել, թե ինքը ինչ պիտի անի»,-ասաց Արա Պապյանը:
Աշոտ ՀԱԿՈԲՅԱՆ
