«Սպառողի ֆունկցիան սկսվել է իրականացվել տառացիորեն երեկ չէ առաջին օրը․ 1182 մարդու կյանքում բան է փոխվել, որովհետեւ այդքան դեպքերով զբաղվել ենք։ «Ա» անձի կյանքում բան է փոխվել, որովհետեւ իր թեյնիկի հարցում իրեն խաբել էին, մենք օգնել ենք։ Առաջին անգամ կա կենտրոնական մարմին, որտեղ ՀՀ սպառողը կարող է դիմել։ 1,6 միլիարդ դրամ փող է վերադարձվել գյուղացիներին՝ մթերողների կողմից, որից 1,2 միլիարդը՝ սիրո եւ համերաշխության պայմաններում, առանց վարչարարության: Մեծ սուպերմարկետը, որը լուծարվում էր, չփակվեց՝ մեր միջամտության արդյունքում եւ հազար մարդ չմնաց առանց աշխատանքի»,- ԱԺ տնտեսական հարցերի մշտական հանձնաժողովի նիստում ասաց Մրցակցության պաշտպանության հանձնաժողովի նախագահ Գեղամ Գեւորգյանը։ Նա պատասխանում էր «Հայաստան» խմբակցության պատգամավոր Թադեւոս Ավետիսյանին։
Ընդդիմադիր պատգամավորն ասել էր՝ չեմ տեսնում ձեր հանձնաժողովի թիրախավորումը, որ ՀՀ քաղաքացու, որպես սպառողի, շահերը պաշտպանի եւ հետաքրքրվել՝ 2025 թվականին ի՞նչ եք նախաձեռնում սպառողի շահերի պաշտպանության դաշտը կարգավորելու համար։ Նա անդրադարձավ նաեւ գազի շուկային․ «Տաքսու վարորդները, հեղուկ գազով մեքենաները վարողներն ամեն օր խոսում են այդ մասին․ աշխարհում ինչ տենդենց տեղի է ունենում այդ շուկաներում, ՀՀ-ի իրավիճակն էապես տարբեր է։ Օրինակ, եթե 30-40 դրամից մի քանի օրում գինը դառնում է 160 դրամ, դա տնտեսական բացատրություն չունի․ ինչի՞ց է գալիս՝ դուք գիտեք»։
Մանրամասները՝ տեսանյութում
Կարդացեք նաև
Մրցակցության պաշտպանության հանձնաժողովի նախագահը ներկայացնում էր 2024 թվականի գործունեության վերաբերյալ հաղորդումը։
Գեղամ Գեւորգյանն իր հաշվետվության մեջ նշեց՝ 2024-ին հանձնաժողովը 3 միլիարդից ավելի տուգանք է նշանակել, ինչն աննախադեպ մեծ թիվ է։ Ամենախոշոր տուգանված ընկերությունների անուններ հանձնաժողովի նախագահը չհրապարակեց, միայն ասաց, որ դրանք խաղային ոլորտի, բենզինի եւ սննդի ոլորտների ընկերություններ են։
Գեղամ Գեւորգյանը տեղեկացրեց նաեւ, որ 2025-ին նախատեսվում է հանձնաժողովի անվանումը փոխել, այն վերանվանելով՝ Մրցակցության, սպառողների պաշտպանության հանձնաժողով, եթե, իհարկե, խորհրդարանը հավանություն տա նախագծին։
Նելլի ԳՐԻԳՈՐՅԱՆ
