Թոմ Լանթոսի անվան մարդու իրավունքների հանձնաժողովի լսումների կիզակետում Ադրբեջանի մարդու իրավունքների ծայրահեղ վատ իրավիճակն էր
Ապրիլի 29-ի լսումների ժամանակ Թոմ Լանթոսի անվան մարդու իրավունքների հանձնաժողովի համանախագահ, կոնգրեսական Քրիս Սմիթը (հանրապետական, Նյու Ջերսի) հայտարարեց, որ ինքը մի օրենսդրական ակտ է պատրաստում՝ «Ադրբեջանի ժողովրդավարության» ակտը, որը միտված է լուծելու Ադրբեջանի մարդու իրավունքների ողբերգական վիճակը, հաղորդեց Ամերիկայի հայկական համագումարը (Համագումար):
Հանձնաժողովի համանախագահ Սմիթը նաև ընդգծեց Ադրբեջանի կողմից պահվող քաղբանտարկյալների և ռազմագերիների ազատ արձակման ապահովման կարևորությունը, հայկական մշակութային ժառանգության պաշտպանության անհրաժեշտությունը, ինչպես նաև Արցախի ժողովրդի վերադարձի հիմնարար իրավունքը՝ ապրելու խաղաղության և ազատության մեջ։
Կարդացեք նաև
«Մենք ողջունում ենք Թոմ Լանթոսի անվան մարդու իրավունքների հանձնաժողովին այս կարևոր լսումներն անցկացնելու համար, որոնք լույս են սփռում հայ ժողովրդի նկատմամբ իրականացվող շարունակական անարդարությունների վրա»,– ասաց գործադիր տնօրեն Բրայան Արդունին։
«Մենք մեր երախտագիտությունն ենք հայտնում հանձնաժողովի համանախագահ, կոնգրեսական Սմիթին այսօրվա ազդեցիկ լսումներն առաջնորդելու համար և մեր խորին ցավակցությունն ենք հայտնում հանձնաժողովի համանախագահ Ջիմ ՄաքԳավերնին նրա դստեր՝ Մոլիի մահվան կապակցությամբ»,– շարունակեց Արդունին։
Ադրբեջանում տեղի ունեցող զարգացումներին քաջ ծանոթ չորս փորձագետ վկաներն էլ խիստ քննադատաբար էին մոտենում Ալիևի ռեժիմին և նրա բռնաճնշողական քաղաքականությանը, որն ամբողջությամբ վերացրել է մամուլի ազատությունը երկրում։ Նրանք նաև բացահայտորեն դատապարտեցին նախագահ Ալիևի կողմից 2024թ․-ին Բաքվում անցկացված COP29 համաժողովի չարաշահումը և հայտնեցին, որ Ադրբեջանում բռնաճնշումները միայն սրվեցին միջոցառումը կազմակերպելուց հետո։ Բոլոր վկաները հաստատեցին մարդու իրավունքների խախտումների, ակտիվիստների անօրինական բանտարկության և անպատժելիության զգացման մասին, որով էլ առաջնորդվում է Ալիևի ռեժիմը, հատկապես COP29-ից հետո։
Արցախի Հանրապետության նախկին պետական նախարար և մարդու իրավունքների պաշտպան Արտակ Բեգլարյանը վկայություն ներկայացրեց կանխամտածված և մեթոդական գործողությունների մասին՝ որպես Ադրբեջանի կողմից Հայոց ցեղասպանության շարունակություն, և Ադրբեջանի կողմից հայատյացության ու հակահայկական քաղաքականության վերաբերյալ։ Պարոն Բեգլարյանը նաև բազմաթիվ քաղաքականությանը վերաբերող առաջարկություններ ներկայացրեց Կոնգրեսի և վարչակազմի համար, ներառյալ՝ թիրախային պատժամիջոցներ Ադրբեջանի դեմ։
Perseus Strategies-ի գործադիր տնօրեն Ջարեդ Գենսերը նշեց որ 2024թ․-ի նոյեմբերին կայացած COP29-ից ի վեր Ադրբեջանը միայն արագացրել է քրիստոնեական ժառանգության բոլոր հետքերը ջնջելու իր ջանքերը և կենտրոնացել է Ադրբեջանի բռնապետի կողմից կեղծ մեղադրանքներով անարդարացիորեն ձերբակալվածների, այդ թվում՝ Ռուբեն Վարդանյանի ծանր վիճակի վրա։
«Ադրբեջանը կիրառում է բարդ դիվանագիտական մարտավարությունների հավաքածու՝ իր կլեպտոկրատական և բռնաճնշողական համակարգի միջազգային քննադատությունը մեղմելու համար»,– իր վկայության ժամանակ ասաց Ժողովրդավարության ազգային հիմնադրամի Ռուսաստանի և Եվրասիայի գծով ավագ տնօրեն Միրիամ Լանսկոյը։ Լանսկոյը նշեց, որ Ռուսաստանից Ադրբեջանի տարածքով դեպի Իրան նոր խողովակաշար է կառուցվում, և որ Ադրբեջանը վերջերս զորավարժություններ է անցկացրել Իրանի հետ։
Freedom Now-ի գործադիր տնօրեն Անդրեա Պրասովը, մանրամասն ներկայացրեց Ադրբեջանի բռնաճնշումների գործողությունները՝ հայտարարելով, որ Ադրբեջանի «ավտորիտար ռեժիմն ունի քաղաքական բռնաճնշումների, լրատվամիջոցների գրաքննության և քաղաքացիական հասարակության նկատմամբ ճնշումների երկար պատմություն», որոնք, ըստ Պրասովի, միայն վատթարացել են COP29-ից ի վեր, և առաջ են քաշել մի շարք քաղաքականության առաջարկություններ։
Ամերիկայի հայկական համագումար
