Այսօր ՀԿԴ-ում դատավոր Ռուդոլֆ Ավագյանի նախագահությամբ քննվող ապօրինի ծագում ունեցող գույքի բռնագանձման գործով տեղի ունեցած դատական նիստում արդարադատության նախկին նախարար Դավիթ Հարությունյանի փաստաբանները սուր հարցեր ուղղեցին դատախազության ներկայացուցիչներին: Բանավեճը հիմնականում կենտրոնացած էր այն հիմքերի շուրջ, որոնցով սկսվել էր Դավիթ Հարությունյանի նկատմամբ դատախազական ուսումնասիրությունը:
Դատախազությունն ուսումնասիրությունը սկսել էր օպերատիվ-հետախուզական մարմնի ներկայացրած հաղորդման հիման վրա:
Պատասխանող կողմը ցանկանում էր պարզել՝ որքանով է դատախազությունը տեղյակ, թե արդյո՞ք ԱԱԾ-ն իրականացրել է օպերատիվ-հետախուզական միջոցառումներ, և արդյո՞ք դատախազությունը հսկողություն է իրականացրել այդ գործընթացի օրինականության նկատմամբ: Դատախազության ներկայացուցիչ Նելլի Տեր-Թորոսյանի պատասխաններից պարզ երեւում էր, որ նրանք ԱԱԾ տեղեկանքի և դրա հիմքում ընկած օպերատիվ-հետախուզական միջոցառումների օրինականության ստուգում չեն իրականացրել՝ պատճառաբանությամբ, որ օրենքը նման լիազորություն իրենց չի վերապահում:
Կարդացեք նաև
Պարոն Հարությունյանի ներկայացուցիչները պնդեցին, որ ԱԱԾ կողմից օպերատիվ-հետախուզական միջոցառումների իրականացման ընթացքում օրինականության նկատմամբ անկախ մարմնի կողմից հսկողության բացակայությունը խախտում է Մարդու իրավունքների եվրոպական դատարանի կողմից սահմանված ստանդարտները: Այս հարցադրմանը դատախազության կողմից հստակ պատասխան չտրվեց:
Այնուհետեւ արդարադատության նախկին նախարարի ներկայացուցիչները բարձրացրին այն հարցը, որ օրենքի և ԱԱԾ-ի ներկայացրած տեղեկանքի վերլուծությունը ակնհայտ վկայում է, որ դրա պատրաստման ընթացքում առերևույթ հանցագործություն է կատարվել:
Դատարանը հետաձգեց նիստը, որպեսզի դատախազությունը հնարավորություն ունենա ծանոթանալու Սահմանադրական դատարանի որոշմանը և միասնական դիրքորոշում ձևավորի:
Դավիթ Հարությունյանին ներկայացնում են փաստաբաններ Արամ Օրբելյանը, Հարություն Հարությունյանը և Արթուր Հովհաննիսյանը:
Աշոտ ՀԱԿՈԲՅԱՆ
