ԱԺ «Հայաստան» խմբակցության պատգամավոր Գառնիկ Դանիելյանն այսօր «Հայելի» ակումբում անդրադարձավ Նոր Նորքի վարչական շրջանի ղեկավարի ու նրա աշխատակիցների կողմից ակտիվիստ Արթուր Չախոյանին ծեծի ենթարկելու դեպքին։
Գառնիկ Դանիելյան
Նա նշեց, որ «Հանրապետություն» կուսակցությունը, լինելով կոալիցիոն գործընկեր ՔՊ-ի հետ, ամբողջովին կիսում է պատասխանատվությունը «Երեւանի քաղաքապետարանում տիրող կոռուպցիայի ու ամենաթողության համար»։
«Ազդեցության գոտիների են բաժանել, իրենք ունեն իրենց թաղապետերը, իրենց վարչության պետերը եւ լիուլի օգտվում են իրենց ընձեռված հնարավորությունից։ Եվ երբ ավագանու տարբեր անդամներ, բլոգերներ բացահայտում են իրենց կոռուպցիոն սկանդալները, ի դեպ՝ միլիոնավոր դոլարների մսխումների մասին է խոսքը, իրենք ջղաձգվում են»,- ասաց Գառնիկ Դանիելյանը։
Նրա խոսքով՝ Երեւանի քաղաքապետարանը որտեղ հասնի, շինթույլտվություններ է տալիս։ Ըստ որոշ տեղեկությունների՝ այդ շինթույլտվությունները տրվում են նաեւ որոշակի գումարի դիմաց։ «Եվ մարդիկ այդ լսումների ժամանակ եկել էին, տեսանք, որ խմբով հարձակվեցին ու այդ մարդկանց ծեծ ու ջարդի ենթարկեցին։ Դրանից հետո պետք է անմիջապես հետեւեր հրաժարականը։ Սա աննախադեպ էր, ես չգիտեմ՝ ՀՀ-ում նման դեպք եղել է, երբ թաղապետարանում ուղիղ եթերի ժամանակ ինչ-որ մեկին ծեծեն, խոշտանգեն, հենց թաղապետի գլխավորությամբ ու թաղապետի հրահանգով մարդուն ծանր մարմնական վնասվածքներ հասցնեն։ Եվ այդքանից հետո պատասխանատվություն կրում է ոչ թե ծեծողը, այլ ծեծվողը։ Ծեծվողին տանում են ոստիկանական բաժանմունք եւ քրեական գործ են հարուցում։
Կարդացեք նաև
Սա Եվրոպա գնացող կուսակցության պատկերն է։ Դեմոկրատիայի քողի տակ սրանք ուռուցքի նման սերտաճել են ամեն տեղ եւ ահավոր վախենում են իշխանությունը կորցնելուց, որովհետեւ ամեն վայրկյան մտածում են, որ իշխանությունը կորցնելուց հետո աուդիտ է լինելու, իրենք բոլորն իրենց չարաշահումների, կոռուպցիոն սկանդալների համար պատասխանատվություն են կրում»,- ասաց Գառնիկ Դանիելյանը։
Ռոզա ՀՈՎՀԱՆՆԻՍՅԱՆ
