«Ոչ»,-հարցին՝ այսօր Ձեր համար Եռատո՞ն է, Հաղթանակի զբոսայգում լրագրողների հետ ճեպազրույցում այսպես պատասխանեց ՀՀ ԱԽ քարտուղար Արմեն Գրիգորյանը։
Լրագրողների հիշեցմանը՝ տեղեկություն տարածվեց, որ Երևանն ու Բաքուն հրադադարի խախտման հետ կապված տեղեկություններ են փոխանցել և հետաքրքրվեցին՝ ի՞նչ տեղեկություններ կան, Արմեն Գրիգորյանը պարզաբանեց․ «ՀՀ-ն խնդրել է դիվանագիտական ճանապարհով տվյալներ տրամադրել խախտումների վերաբերյալ, որոնց մասին Ադրբեջանը հայտարարել է։ Նրանց մասին հետաքննություն է կատարել ՀՀ-ն և փոխանցել Ադրբեջանին բոլոր միջադեպերի վերաբերյալ։ ՀՀ հայտարարության մասին, որ Ադրբեջանն է խախտումներ կատարել, Ադրբեջանին տվյալներ են փոխանցվել, և ՀՀ-ն ակնկալում է մանրամասն հետաքննություն։ Ըստ իրենց՝ իրենց կողմից հետաքննություն են կատարել դրանց մասին։ Պարզվել է, որ, ընդհանուր առմամբ, այդպիսի խախտումներ չեն եղել»։
Հարցին՝ ո՞րն է Ձեր ուղերձը տոնի կապակցությամբ, Արմեն Գրիգորյանը պատասխանեց․ «Եկել ենք հարգելու Երկրորդ համաշխարհային պատերազմում իրենց կյանքը զոհած բոլոր այն մարդկանց հիշատակը, որոնք իրենց կյանքն են դրել հաղթանակ կերտելու համար»։
Լրագրողների դիտարկմանը՝ նախկինում գալիս էիք հարգելու Արցախյան պատերազմում իրենց կյանքը զոհածների և Շուշին ազատագրածների հիշատակը, հիմա դա չե՞ք անում, Արմեն Գրիգորյանն այսպես արձագանքեց․ «Նաև եկել ենք նրանց հիշատակը հարգելու համար։ Տոնն ու հիշելը տարբեր բաներ են։ Դուք ասում եք՝ Եռատոն է, Եռատոնն ու զոհերի հիշատակը հարգելը տարբեր բաներ են»։
Կարդացեք նաև
Հարցին՝ Նիկոլ Փաշինյանի և Վլադիմիր Պուտինի միջեւ երկկողմ հանդիպում նախատեսվա՞ծ է, և արդյոք Նիկոլ Փաշինյանը բարձրացնելո՞ւ է հիբրիդային պատերազմի մասին մտահոգությունը, ԱԽ քարտուղարը պատասխանեց․ «Չեմ կարծում, որ հիբրիդային պատերազմի մասին խոսվում է միայն վերջին շրջանում։ Դրա մասին երևի խոսվում է 2018-ից։ Երկկողմ հանդիպման մասին եկեք սպասենք՝ կարծում եմ վարչապետի մամուլի և Կրեմլի մամուլի ծառայությունները հաղորդագրություն կտարածեն»։
Տաթև ՀԱՐՈՒԹՅՈՒՆՅԱՆ
