«Տիկին Մկրտչյան, ընդհանրապես դուք խի՞ եք եկել, ես ձեզ առաջարկում եմ հետեւել «Հայաստան» խմբակցության օրինակին եւ հելնել՝ գնալ ստեղից։ Ընդհանրապես, դուք որեւէ օգուտ չեք տալիս։ Իշխանազավթն էլ դուք եք, ձեր քաղաքական հայրիկը, բիոլոգիական հայրիկը եւ մնացածը։ Ցտեսություն»,- ԱԺ նիստում «Պատիվ ունեմ» խմբակցության պատգամավոր Աննա Մկրտչյանին ասաց ԱԺ փոխնախագահ Ռուբեն Ռուբինյանը։
Խորհրդարանը 56 «կողմ», 2 «ձեռնպահ», դեմ՝ զրո, քվեարկությամբ՝ երկրորդ ընթերցմամբ եւ ամբողջությամբ ընդունեց «Ռազմարդյունաբերական համալիրի մասին» օրենքում լրացում կատարելու մասին նախագիծը։
«Պատիվ ունեմ» խմբակցությունը «ձեռնպահ» էր քվեարկել նաեւ առաջին ընթերցման ժամանակ։ Իշխանական պատգամավոր Արմեն Խաչատրյանն էլ տարակուսեց նման քվեարկության համար՝ դիմելով մասնավորապես Տիգրան Աբրահամյանին, որն, ըստ Արմեն Խաչատրյանի, անընդհատ խոսում է բանակի, ռազմական ոլորտի մասին, քննադատում է, բայց նման կարեւոր հարցին «ձեռնպահ» է քվեարկում։
Երեկվա քաշքշոցից հետո «Հայաստան» խմբակցությունն այսօր արտահերթ նիստին չմասնակցեց։
Կարդացեք նաև
Երկրորդ ընթերցման քվեարկությունից հետո, վարման կարգով խոսք վերցրեց «Պատիվ ունեմ» խմբակցության պատգամավոր Աննա Մկրտչյանը եւ ասաց․ «Ցավալի է, բայց ոչ մի նախագիծ, այդ թվում նաեւ ՝ ռազմարդյունաբերությանը վերաբերող, ի զորու չի լինելու փոխել այն փաստը, որ իշխանազավթը 6 միլիարդից ավել զենք-զինամթերք է հանձնել Ադրբեջանին։ Ցավալի է, բայց այս նախագիծն ի զորու չի լինելու փոխել այն փաստը, որ իշխանազավթը հրաժարվում է վերադարձնել Ադրբեջանի կողմից օկուպացված ՀՀ տարածքները։ Վերջիվերջո, ոչ այս նախագիծը, ոչ էլ որեւէ այն նախագիծ չի փոխելու այն փաստը, որ Նիկոլը չկրակելու հրաման է տվել Հայաստանի հանրապետության զինվորին․ չպաշտպանվելու եւ չպաշտպանելու»։
Նելլի ԳՐԻԳՈՐՅԱՆ
