ԱԶԱՏՈՒԹՅԱՆ ՃԱՆԱՊԱՐՀԻՆ. ՀԱՅԱՍՏԱՆՈՒՄ ՎԱՅՐԻ ԿԵՆԴԱՆԻՆԵՐԻ ՓՐԿՈՒԹՅՈՒՆԸ ԴԱՌՆՈՒՄ Է ԻՐԱԿԱՆՈՒԹՅՈՒՆ
Հայաստանում անազատ պայմաններում պահվող վայրի կենդանիների խնդրի լուծման համար պետությունն ու բնապահպանական կազմակերպությունները ձեռք մեկնեցին միմյանց:
Կենսաբազմազանության միջազգային շաբաթվա շրջանակում մայիսի 19-ին կարևոր հանդիպում կայացավ Վայրի կենդանիների փրկարար կենտրոնում (WRC): Այս հավաքի նպատակն էր համատեղ լուծումներ գտնել մասնավոր տարածքներում և ժամանցի վայրերում անազատ պայմաններում պահվող վայրի կենդանիների խնդիրների համար:
Հանդիպմանը մասնակցեցին պետական կառույցների ներկայացուցիչներ՝ ՀՀ շրջակա միջավայրի նախարարի տեղակալ Տիգրան Գաբրիելյանի գլխավորությամբ: Ներկա էին նաև «Հայանտառ» ՊՈԱԿ-ի տնօրենի պաշտոնակատար Վիգեն Չիլինգարյանը և «Խոսրովի անտառ» պետական արգելոցի տնօրեն Ռադիկ Օղիկյանը: Միջոցառմանը հրավիրվել էին շրջակա միջավայրի նախարարության, Բնապահպանական և ընդերքի տեսչական մարմնի, Էկոպարեկային ծառայության և Բնության համաշխարհային հիմնադրամի (WWF) ներկայացուցիչներ: Մասնակցում էին նաև «Մարդ-վայրի բնություն կոնֆլիկտ» թեմայով աշխատանքային խմբի անդամները:
Կարդացեք նաև
Հանդիպումը սկսվեց «Վայրի բնության և մշակութային արժեքների պահպանման հիմնադրամի» (FPWC) գործունեության հիմնական ուղղությունների ներկայացմամբ: Այնուհետև մասնակիցները ծանոթացան Կովկասյան կենսաբազմազանության ապաստարանին՝ տեղում ուսումնասիրելով մասնավոր պահպանվող տարածքի աշխատանքը, ենթակառուցվածքները և նորարարական տեխնոլոգիաներով հագեցվածությունը:
Հանդիպման ընթացքում մանրամասն քննարկվեցին՝
- Վայոց ձորի մարզում մարդ-վայրի բնություն կոնֆլիկտի մեղմմանն ուղղված ծրագրերը
- Փրկված կենդանիների խնամքի գործընթացները
- Վերջին տարիներին արձանագրված մարդ-կենդանի կոնֆլիկտների դինամիկան
Քննարկման հիմնական արդյունքները եղան՝
- Գերության մեջ պահվող կենդանիների հայտնաբերում և հավաքագրում
- Մշակվելու է ժամանցի վայրերում անազատ պայմաններում պահվող վայրի կենդանիների հայտնաբերման մեխանիզմ
- Սահմանվելու են վերահսկողության հստակ գործիքներ՝ կապված COP17 համաժողովի հետ
Առաջիկա շաբաթների ընթացքում կմշակվեն շրջակա միջավայրի նախարարության հետ ինստիտուցիոնալ համագործակցության մեխանիզմներ։
Տիգրան Գաբրիելյանը ստանձնեց կոնկրետ պարտավորություն՝ խնդրի լուծման ուղղությամբ ձեռնարկել բոլոր հնարավոր միջոցները։ Բոլոր մասնակիցները համաձայնեցին, որ պետք է վերացնել այն արատավոր պրակտիկան, երբ վայրի կենդանիները պահվում են իրենց բնական միջավայրին խորթ պայմաններում, առանց պահանջվող փաստաթղթերի և պատշաճ խնամքի:
Քննարկումից հետո մասնակիցները FPWC տնօրեն Ռուբեն Խաչատրղյանի հետ շրջեցին փրկարար կենտրոնում: Նրանք ծանոթացան՝
- Կենդանիների խնամքի պայմաններին
- Վերականգնման թերապիայի մեթոդներին
- Կենտրոնի տեխնիկական հնարավորություններին
Ներկայումս կենտրոնում ապաստան է գտել շուրջ 30 արջ: FPWC-ն կառուցում է երկրորդ նմանատիպ կենտրոնը, որպեսզի կարողանա օգնել ավելի շատ օգնության կարիք ունեցող գորշ արջերի: Հիմնադրամը հաստատեց իր պատրաստակամությունը՝ ապաստան տալ բոլոր կարիքավոր գորշ արջերին և հնարավորության դեպքում այլ տեսակի վայրի կենդանիներին: Այս նախաձեռնության հաջողության համար անհրաժեշտ է բոլոր պետական կառույցների ակտիվ մասնակցությունը։
Հանդիպումն ավարտվեց խորհրդանշական ծառատունկով: Մասնակիցները տնկեցին մի քանի ծառ՝ ի նշան կենսաբազմազանության պահպանման և բնության հետ ներդաշնակ հարաբերությունների: Այս քայլը կրկին ընդգծեց մարդու և բնության միջև պատասխանատու կապի կարևորությունը:
Հանդիպման մասնակիցները հիացան կենտրոնի հնարավորություններով և մասնագիտական մոտեցմամբ: Հանդիպումն ավարտվեց վստահությամբ, որ շուտով Հայաստանում կլուծվի մասնավոր տարածքներում, ժամանցի վայրերում և հասարակական այլ վայրերում տանջվող վայրի կենդանիների խնդիրը:
Այս հանդիպումը ևս մեկ անգամ ցույց տվեց, որ մարդ-բնություն ներդաշնակ հարաբերությունները կարևոր են ոչ միայն բնապահպանական, այլև սոցիալական ու մշակութային տեսանկյունից: Միջոցառումը դարձավ լավ հարթակ երկխոսության, փորձի փոխանակման և համատեղ ծրագրերի ձևավորման համար, որոնք կօգնեն պահպանել կենսաբազմազանությունը և բարձրացնել կենդանիների բարեկեցությունը:
Վայրի բնության և մշակութային արժեքների պահպանման հիմնադրամ
