Ոստիկանության Մաշտոցի բաժանմունքում վարչական վարույթ է հարուցվել «Հանուն Հանրապետության» կուսակցության երկու անդամների նկատմամբ՝ ՌԴ նախագահ Վլադիմիր Պուտինի նկարով մեծադիր պաստառը՝ «հանցագործ» գրառմամբ Կիեւյան կամրջից կախելու համար։ Այս մասին ֆեյսբուքյան էջում տեղեկացնում է կուսակցության նախագահ Արման Բաբաջանյանը։
Ակցիան, հիշեցնենք, իրականացվել էր ՌԴ ԱԳ նախարար Սերգեյ Լավրովի՝ Հայաստան այցին ընդառաջ։
Ոստիկանության բաժանմունքից դուրս գալուց հետո՝ Արման Բաբաջանյանը տեղեկացրեց, որ վարույթը հարուցվել է Կիեւյան կամրջից կախված ՌԴ նախագահ Վլադիմիր Պուտինի մեծադիր պաստառի վերաբերյալ տարածված տեսանյութի հիման վրա։
Կարդացեք նաև
Պաստառը կախող անձինք նույնականացվել են․ «Գործով զբաղվում է բաժնի պետի տեղակալը, նաեւ բաժնի պետը՝ Խմելյանը դիմավորեց, ընդունեց մեզ։ Հայտարարել եմ, որ պաստառի կախման գործողության կազմակերպիչը անձամբ ես եմ եւ, որ իմ ընկերները չեն կրել որեւէ կազմակերպչական կամ գործնական դերակատարում։ Բաժնի պետի տեղակալը պատրաստվում է զեկուցագիր գրել իմ մասով․ տեսնենք, թե կարողանո՞ւմ են վարույթ հարուցել, թե՞ ոչ»։
Արման Բաբաջանյանը կարեւոր է համարում պաստառի ճակատագրի հարցը։ Պահանջել են այն վերադարձնել, սակայն բաժնի պետը սկզբում ասել է՝ պաստառը ոչնչացվել է, ապա ասել է, թե դեռ պետք է պարզի՝ որտե՞ղ է այն, ի՞նչ են արել դրա հետ։
Արման Բաբաջանյանը ոստիկանության բաժին է այցելել փաստաբան Տիգրան Եգորյանի հետ․ առարկել են վարույթ հարուցելու որոշմանը՝ գրավոր գրությամբ հիմնավորելով, որ որեւէ իրավախախտում չի եղել, ակցիան եղել է խաղաղ, իրականացվել է ժողովրդավարական սկզբունքներին համապատասխան։
Նելլի ԳՐԻԳՈՐՅԱՆ
