Այսօր Գեղարքունիքի մարզի Սեւանի նստավայրում շարունակվող Ազատ գյուղի զինվորական կացարանում բռնկված հրդեհի ու դրա հետեւանքով 15 զինվորի մահվան դեպքի դատաքննության գործով հարցաքննվեց ԳՇ ծառայության պահեստապետ Գեւորգ Նիկողոսյանը:
Ըստ նրա՝ մինչեւ Ազատի կացարանի հրդեհը հակահրդեհային միրջոցներ պահեստում եղել են, խոսքը վերաբերում է կրակմարիչներին: Համաձայն Նիկողոսյանի՝ մոտ 200-ի հասնող կրակմարիչ էին ստացել, իսկ ինչ վերաբերում է հակահրդեհային վահանակներին, ըստ վկայի, դրանք կիսատ են եղել. « Զորամասը վատ վիճակում է եղել, վահանակները զորամասից հավաքել էին, որ ռմբակոծության տակ չընկնեն»:
Ի՞նչ հակահրդեհային միջոցներ էին հատկացվել ինժեներասակրավորների վաշտին, այս հարցին վկան պատասխանեց՝ տեղյակ չէ, ոչ մի բան չէին ստացել: Դիմել էին ու չէի՞ն ստացել, թե՞ չէին դիմել, որ ստանային՝ հանրային մեղադրողի այս հարցին վկան պատասխանեց՝ չի կարող ասել:
Կարդացեք նաև
-Եթե դիմեին, կստանայի՞ն, – հարցը վերաձեւակերպեց հանրային մեղադրողը, ինչին ի պատասխան վկան կրկնեց՝ չի կարող ասել:
Վկան հայտնեց, որ Ազատ գյուղի կացարանի հրդեհից հետո ցուցում են ստացել, որ պահեստում պահվող կրակմարիչներն արագ բաժանեն այն բոլոր կացարաններին, որտեղ չկան, որպեսզի Ազատի կացարանի դեպքը այլ տեղերում չկրկնվի. «Ցուցում ստացանք, որ կրակմարիչները, որոնք դեռ չէին բաժանվել, մնացած կացարաններին բաժանվեր մեկ ժամ առաջ, որ նման բան չկրկնվեր: Անձնական մեքենայով կրակամրիչները լցրեցինք ու չորս կացարան բաժանեցինք»:
Արփինե ՍԻՄՈՆՅԱՆ
