«Հիմա այն ժամանակն է, երբ տաք եղանակով պայմանավորված կարող են բարձրանալ հիվանդացության ցուցանիշները, չի բացառվում, որ կարող են նաեւ առաջանալ բռնկումներ, եթե չպահպանենք որոշ պարզ կանոններ» ,-«Արմենպրեսի» մամուլի սրահում նշեց ՀՀ առողջապահության նախարարության հիվանդությունների վերահսկման եւ կանխարգելման ազգային կենտրոնի վարակիչ հիվանդությունների համաճարակաբանության վարչության պետ Ռոմելլա Աբովյանը՝ անդրադառնալով աղիքային վարակիչ հիվանդությունների հնարավոր ռիսկերին։
Ռոմելլա Աբովյան
«2024թ ամառվա ժամանակահատվածում արձանագրվել է սննդի գործոնով պայմանավորված աղիքային վարակիչ հիվանդության 5 բռնկում, որից 2-ը հանրային սննդի կազմակերպություններում՝ հենց Երեւան քաղաքում, մնացածը՝ մարզերում: Բռնկման պատճառ է հանդիսացել սննդի պահման, պահպանման կանոնների խախտումը, ինչը բերել է նրան, որ սննդամթերքը ենթարկվել է երկրորդային աղտոտման, եւ մենք ունեցել ենք այս բռնկումները: Ընդհանուր առմամբ, պետք է նշեմ, որ աղիքային վարակիչ հիվանդությունները փոխանցվում են մի շարք գործոններով՝ սննդի, ջրի, ձեռքերի միջոցով եւ բռնկման պատճառ հանդիսացող երկրորդային աղտոտման հետեւանքով»,-նշեց Ռոմելլա Աբովյանը:
Նա կոչ արեց սննդատեսակները գնել խանութներից, իսկ արագ փչացող սննդամթերքները՝ կաթը-կաթնամթերքը, միս-մսամթերքը, կրեմային հրուշակեղենը անպայման վերցնել սառնարաններից: Կարեւորեց նաեւ սննդամթերքի պատրաստման կանոնները:
Հայկ Հարությունյան
ԱՆ Ինֆեկցիոն հիվանդությունների ազգային կենտրոնի բժիշկ-վարակաբան Հայկ Հարությունյանը նշեց, որ ճիշտ ժամանակին բժշկի դիմելու դեպքում հնարավոր է ոչ միայն կանխել աղիքային հիվանդությունների առաջացումը, այլեւ հիվանդության ծանր դեպքերը: «Հունվար ամսից մինչեւ հիմա արձանագրված ստացիոնար հոսպիտալացման ենթակա բոլոր դեպքերի մեծ մասը պայմանավորված է ուշ դիմելիությամբ: Գրեթե բոլոր դեպքերը հայտնվում են հիվանդանոցում առանց առաջնային բուժօգնություն ստանալու, կամ որ ավելի վատ է՝ սխալ բուժօգնություն ցույց տալուց հետո»:
Կարդացեք նաև
Բժիշկ-վարակաբանը պարզաբանեց, որ լուծը ոչ միայն աղիքային ինֆեկցիաների ժամանակ է դիտվում, այլեւ մի շարք այլ հիվանդությունների, այլ օրգան համակարգերի հետ կապված խնդիրների դեպքում, ու այդ տարբերությունը կարող է պարզել միայն մասնագետը:
«Ինքնաբուժությամբ, ինքնաախտորոշմամբ զբաղվելը միշտ իր հետեւանքներն առաջացնում եւ դրսեւորվում է հիվանդության բարձր բարդացած ձեւերով»,-ընդգծեց Ինֆեկցիոն հիվանդությունների ազգային կենտրոնի բժիշկ-վարակաբանը:
Գոհար ՀԱԿՈԲՅԱՆ
