«Սրբազան շարժման» առաջնորդ Բագրատ արքեպիսկոպոս Գալստանյանն Ապարանում մասնակցում է Առաջին Հանրապետության օրվա կապակցությամբ անցկացվող միջոցառումներին։
«Այսօրվա խորհուրդը մեր ինքնաճանաչողության եւ ինքնագնահատականի մասին է, այն իմաստով, որ երբ մենք հասնում ենք մեր իրական ինքնաճանաչողության աստիճանին, հրաշքներ ենք գործում։ Սարդարապատի, Բաշ-Ապարանի, Ղարաքիլիսիայի ճակատամարտերի, Հանրապետության հռչակման ամբողջ խորհուրդը դրա մասին է, թե ինչպես կարող է լքված, ցեղասպանված մի բուռ ժողովուրդ ոտքի կանգնել, ոչ միայն հաղթանակել, այլ նաեւ հռչակել իր սեփական պետությունը։ Նրանք, ովքեր չվախեցան եւ առաջնորդեցին, հաղթանակը կնքվեց, այդպես է նաեւ այսօր»,- ասաց Բագրատ սրբազանը։
Նրա խոսքով՝ անհամատեղելի են այսօրվա չարիքի իշխանությունը եւ մայիսի 28-ի այս խորհուրդը։ «Դուք պատկերացնո՞ւմ եք, եթե 107 տարի առաջ Գեւորգ 5-րդ վեհափառը, Արամ Մանուկյանը, գեներալ Սիլիկյանը, գեներալ Նազարբեկյանը, Պողոս Բեկ-Փիրումյանը, Դանիել Բեկ-Փիրումյանը, Դրաստամատ Կանայանը եւ մնացած բոլորը հանկարծ ասեին՝ ժողովուրդ, չենք կարողանում, գնանք իրական Հայաստանի հետքերով, ինչպես այսօրվա չարիքն է ասում։ Այսօր մենք գոյություն կունենայի՞նք ընդհանրապես, վստահաբար չէինք ունենա։ Հիմա այս չարիքներն ի՞նչ համատեղելիություն ունեն այսօրվա խորհրդի հետ, բացարձակ չունեն, սրանք պղծել, մսխել, ջարդել ու փշրել են ամեն ինչ եւ ժողովրդին տեւապես տանում են պարտության, ոչ թե հաղթանակի»,- հավելեց նա։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
