Քաղաքական գործիչ, ՀԱԿ փոխնախագահ Արամ Մանուկյանը կուսակցության գրասենյակում բանախոսություն ունեցավ Առաջին Հանրապետության օրվա առիթով:
«Այսօր Հայաստանի Հանրապետության պետական տոներից մեկն է՝ Հայաստանի Առաջին Հանրապետության անկախության օրը: Այս օրը պետական է, բայց պետականորեն համարյա չի նշվում, շատ քիչ տեղերում կարելի է զգալ տոնական տրամադրություն, որովհետեւ այսօրվա իշխանությունների համար Անկախությունը բարձրագույն արժեք չէ:
Առաջին Հանրապետությունը մեր երկրի պատմության լավագույն կղզյակներից մեկն է: Տեւել է շատ կարճ ժամանակահատված՝ ընդամենը 2,5 տարի: Բայց կարեւոր է, որ այդ 2,5 տարին եղել է 600 տարվա ընդմիջումից հետո: Այսինքն, Անկախանալու երազանքը իրականացվել է, դարձել է հողեղեն, դարձել է պառլամենտ, դարձել է կառավարություն մի ժամանակահատվածում, երբ Հայաստանում 40 հազար որբ ու սոված երեխա կար եւ Հայաստանը բառացիորեն ծվատված էր»,-ասաց Արամ Մանուկյանը եւ ներկայացրեց այն ժամանակ երկրի վիճակը, կառավարիչների առջեւ ծառացած անլուծելի թվացող խնդիրները, որոնք, սակայն, հաղթահարվել են:
«Սոցիալական ծանրագույն վիճակի պայմաններում նաեւ համալսարաններ են կառուցվել, դիվանագիտական հարաբերություններ են հաստատվել, մոտավորապես 40 երկիր Հայաստանի անկախությունը ճանաչել է եւ այդ ընթացքում մենք ունեցել ենք հյուպատոսական ծառայություններ, դեսպանատներ եւ այլն: 25 հազարանոց բանակ են պահել ու նաեւ եղել է մեխանիզմ պատերազմի ընթացքում այդ թիվը հասցնելու մինչեւ 40 հազարի: Դա շատ մեծ թիվ էր այն ժամանակների համար, այն էլ՝ քանդված տնտեսության պայմաններում: Բայց, այնուամենայնիվ այդ ամենն արվել է: Այսպիսի կարծիք ասեմ. եթե չլիներ Առաջին Հանրապետությունը, հավանաբար, չէր լինի Երրորդ Հանրապետությունը, որի մեջ մենք ապրում ենք: Դա ժառանգություն էր, որ մենք վերցրեցինք եւ օգտագործեցինք Երրորդ Հանրապետության ժամանակ»,-ասաց Արամ Մանուկյանը:
Կարդացեք նաև
Աշոտ ՀԱԿՈԲՅԱՆ
