«Որմնանկարները վանդալիզմի են ենթարկվել ու կշարունակեն ենթարկվել, եւ փոխանակ այս ամենը վերականգնվի ու պահպանվի, մատնված են անտարբերության, անուշադրության, բարձիթողի վիճակում են գտնվում: Օրվա իշխանությունները կրում են սրա պատասխանատվությունը»,- ասաց Երեւանի ավագանու «Մայր Հայաստան» խմբակցության ղեկավար Մանուկ Սուքիասյանը, որը նույն դաշինքի անդամ Սոնա Աղեկյանի հետ Էրեբունի ամրոցի տարածք էր ժամանել ահազանգի հետքերով: Ամրոցի հսկիչը մտահոգություն հայտնեց, որ ամրոցի պատը մի օր կարող է փլվել եւ մարդկանց թողնել տակը:
«Միգուցե շատերն ասեն՝ բայց սա 7 տարում չի եղել, նախկինում էլ է եղել: Ավելի վատ, որ պայքարելով արատավոր երեւույթների դեմ՝ եկել ես իշխանության եւ արատավոր երեւույթների դրսեւորումները չես վերացնում: Այդ դեպքում հարց է առաջանում՝ բա դու ինչո՞վ ես տարբերվում նախորդներից: Երեւանի քաղաքապետարանի շքեղաշուք համերգները, միջոցառումները, ճառերն ու կենացները գրոշի արժեք չունեն այս խորապատկերին, եթե նման վիճակ է այստեղ… Երեւանի քաղաքապետ լինելը միայն հանդիսավոր խոսքեր ու ճառեր չի ենթադրում, դա կոնկրետ գործողություն է, իսկ սրանք ոչ միայն խոստումները չեն կատարում, դեռ մի բան էլ նպաստում են հարեւան երկրի հռետորաբանությանը, ուզում են հերքել կապը Ուրարտուի հետ»,-հավելեց Մանուկ Սուքիասյանը:
Նա նշեց, որ «Էրեբունի» պատմահնագիտական արգելոց-թանգարանի տարածքում անմխիթար վիճակ է, տնօրինություն չկա, ծրագրերը կասեցված են: Նրա ձեւակերպմամբ, կա կառավարման լրջագույն ճգնաժամ, ջուր չլինելու հետեւանքով տարածքը ոչ թե սիզամարգերով է պատված, այլ տատասկով, տարածքը չունի տեսահսկման համակարգ:
«Իսկ չվերահսկվող տարածքը պարարտ հող է, որ զանազան անցանկալի երեւույթներ տեղի ունենան… Եթե ես դրսից հյուր ունենամ, կտատանվեմ այստեղ բերել: Ցավոք, ուրիշներն իրենց եղածն են սարքում, իսկ մենք մեր եղածը չենք կարողանում ճիշտ մատուցել»,- ասաց Երեւանի ավագանու «Մայր Հայաստան» խմբակցության ղեկավարը:
Կարդացեք նաև
Գոհար ՀԱԿՈԲՅԱՆ
