Լեհաստանի հարավ-արեւմուտքում գտնվող Վրոցլավ քաղաքն այս երկրի այցեքարտերից է: Այն հարուստ է գեղեցիկ շենք-շինություններով, պատմամշակութային հուշարձաններով, որոնց մի մասը ներառված է ՅՈՒՆԵՍԿՕ-ի Համաշխարհային ժառանգության հուշարձանների ցանկում:
Կարդացեք նաև
Վրոցլավը նաեւ համալսարանական քաղաք է, ավելին՝ Վրոցլավի համալսարանը Նոբելյան մրցանակի ինը դափնեկիր է տվել: Տեղի 20 համալսարաններում սովորում է շուրջ 130 հազար ուսանող:
Բացի շքեղ ճարտարապետությունը, Վրոցլավի մերօրյա այցեքարտն են դարձել թզուկների արձանիկները: Քաղաքի տարբեր անկյուններում սփռված են շուրջ 1000 թզուկներ:
Վրոցլավում է գտնվում Եվրոպայի ամենահին ռեստորանը՝ Piwnica Swidnicka-ն, որը տեղակայված է Շուկայի հրապարակում եւ ըստ որոշ տեղեկությունների՝ հիմնադրվել է 1273թ.։ Ասում են՝ ժամանակին այս ռեստորանի այցելուների թվում են եղել նաեւ Շոպենն ու Գյոթեն:
Վրոցլավում 112 կամուրջ կա, ինչի համար լեհերն իրենց գեղեցկագույն քաղաքն անվանում են Հյուսիսային Վենետիկ:
Վրոցլավը բազմաթիվ բնորոշող գծեր ունի, դրանցից մեկը Ջիմի փառատոնն է, որը նվիրված է Ջիմի Հենդրինքսին: Ամեն տարի հազարավոր կիթառահարներ գալիս են այստեղ, որպեսզի նվագեն Hey Joe հիթը եւ փորձեն հայտնվել Գիննեսի ռեկորդների գրքում: Ի դեպ, Հենդրիքսը երբեւէ չի եղել Վրոցլավում:
Վրոցլավը հեքիաթային քաղաք է:
ԳՈՀԱՐ ՀԱԿՈԲՅԱՆ
Վրոցլավ-Երեւան
«Առավոտ» օրաթերթ
30.05.2025
