Արմինե եւ Րաֆֆի Հովհաննիսյանների հիմնադրած «Օրրան» բարեգործական կազմակերպությունն այս տարի 25-րդ անգամ նշեց հունիսի 1-ը՝ Երեխաների իրավունքների պաշտպանության միջազգային օրը։ Ինչպես նախորդ տարիներին, այնպես էլ այս անգամ «Օրրանի» բակը զարդարված էր գունավոր փուչիկներով, իսկ «Օրրանի» սաներն իրենց երգ ու պարով էլ ավելի տոնականություն հաղորդեցին կազմակերպված միջոցառմանը:
«Արմենիա Մարիոթ» հյուրանոցի խոհարարական անձնակազմն ու աշխատակիցները հոգացել էին բոլոր պատրաստությունները՝ ավանդույթ դարձած համեղ բուրգերները պատրաստելու համար։ Օրվա շեֆ խոհարարն այս տարի «Օրրանի» բարեկամ, գործարար Ռալֆ Յիրիկյանն էր։ Նրան էին միացել նաեւ «Օրրանի» հյուրերը՝ շոու-բիզնեսի, մարզաշխարհի եւ մեդիայի ներկայացուցիչներ, հասարակական գործիչներ:
Կարդացեք նաև
Երեխաներին շնորհավորելու էին եկել Էվելինա Շահիրյանը, Նաիրա Շահիրյանը, երգչուհի Նառան, Թամարա Պետրոսյանը, նկարիչ Աշոտ Յանը, Գոհար Իգիթյանը, Նազիկ Ավդալյանը եւ բարեգործական կազմակերպության այլ բարեկամներ, որոնք իրենց ներկայությամբ օրն ավելի հիշարժան դարձրին։
Օրվա համեղ հյուրասիրությունը սիրով ապահովել էին «Տաշիր Պիցցան», «Կոկա-Կոլա Հելլենիկ Բոթլինգ Քամփնի Արմենիա» ՓԲԸ-ն եւ «Թամարա» ընկերությունը։ Իսկ երեխաների համար ամենասպասվածը տոնական տորթն էր, որի՝ նախ մոմերը վառվեցին, ապա շուրջպարին զուգահեռ այն կտրվեց ու բաժանվեց փոքրիկներին:
Հիշեցնենք, որ «Օրրանի» երեւանյան եւ վանաձորյան կենտրոններում ամեն օր շուրջ 200 երեխա եւ 60 տարեց օգտվում է սննդի, առողջապահական, սոցիալական, կրթական, մշակութային եւ այլ ծառայություններից: 25 տարիների ընթացքում «Օրրանն» աջակցել է ավելի քան 30 000 մարդու՝ Արցախից, Լիբանանից, Սիրիայից եւ Հայաստանից:
Գոհար ՀԱԿՈԲՅԱՆ
