Լրագրողները ԿԳՄՍ նախարար Ժաննա Անդրեասյանին հարցրին՝ ինչպե՞ս է վերաբերվում Նիկոլ Փաշինյանի հայհոյախառն գրառմանը՝ ուղղված եկեղեցուն եւ հոգեւորականությանը: Նա շրջանցելով հարցը՝ նշեց, որ ԵՊՀ-ում են գտնվում, որովհետեւ պետությունը մեծ ծավալի ներդրումներ է անում բուհերում եւ գիտահետազոտական կառույցներում, իսկ ԵՊՀ-ում ձեւավորվել են նոր հզորություններ, որոնք հնարավորություն կլինի այսօր ներկայացնել, ինչ առիթով էլ ԵՊՀ է ժամանել Փաշինյանը:
Որպես ԿԳՄՍ նախարար՝ ինչպե՞ս է վերաբերվում «Կրթությունը նորաձեւ է» արշավի մասնակից վարչապետի հայհոյախառն բառապաշարով արտահայտություններին: Այս հարցին ի պատասխան էլ՝ Ժաննա Անդրեասյանը նշեց. «Վարչապետն արդեն մեկնաբանել է իր գրառումը, եւ ես ավելացնելու որեւէ բան չունեմ»:
Ապա հավելեց. «Եթե հանրային ձեւավորված խոսույթի մասին եք խոսում, ձեր ուշադրությունը պետք է հրավիրեմ՝ նկատելու, որ այդ խոսույթը նոր չի, որ ձեւավորված է: Լավ է, որ ուշադիր ենք, արժի, որ ուշադիր լինենք նաեւ այն դեպքերում, երբ այդ բառամթերքը հնչում է տարբեր կողմերից, այդ թվում, օրինակ, իմ նկատմամբ: Բնականաբար, որեւէ մեկը չի կարող արդարացնել այդ խոսույթը: Մենք տարբեր քննարկումներ ենք ունեցել, առիթ ենք ունեցել կառավարության նիստում էլ խոսել այդ հարցերից… Ես կարծում եմ, որ այն մեկնաբանությունները եւ վարչապետի կողմից հավելյալ գրառումները, որ արվեցին, ավելի քան պարզ են դարձնում ասելիքը»:
Կարդացեք նաև
Ինչ վերաբերվում է Փաշինյանի՝ եկեղեցիների չուլանացման մասին արտահայտությանը, այս մասին էլ ԿԳՄՍ նախարարը նշեց. «Այն տրամաբանությունը, որ գործում մեր որոշ եկեղեցիներում, թողնում է նման տպավորություն, եւ ես դրա համար ցավում եմ, ինչպես պետք է ցավի մեր երկրի յուրաքանչյուր քաղաքացի: Եթե մենք արժեւորում ենք մեր մշակույթը, առաջին հերթին պետք է մեր կողքին նայենք…Թե չէ կարելի է մեզ անընդհատ դնել զարմացած մարդկանց տեղ եւ մտածել, որ բացահայտվում են բաներ, որոնք մենք էլ չգիտեինք… Ավելի լավ է, որ մենք այդ խնդիրներից խոսենք, ու խոսելու ձեւերը կարող են տարբեր լինել, բայց այն, որ խնդիր կա, եւ խնդիրներին պետք է անդրադառնալ, ավելի քան ակնհայտ է»:
Լրագրողները ԿԳՄՍ նախարար Ժաննա Անդրեասյանին հարցրին՝ հայհոյանքը կրթելու գործընթացում օգնո՞ւմ է: «Ես հասկանում եմ ձեր հարցադրումների, ոճը, տրամաբանությունը, ինքս կարծում եմ, որ մենք պետք է շատ ուշադիր լինենք հանրային խոսույթի նկատմամբ, ես դա դիտում եմ նաեւ կրթության ուղիղ խնդիրը: Մենք առիթ ենք ունեցել նաեւ խոսելու, որ ընտանիքներում էլ են երեխաներին սովորեցնում որոշակի անպարկեշտ բառեր, ինչը որեւէ կերպ չեմ կարող դա համարել ընդունելի, որովհետեւ կարծում եմ, որ բոլորս կարող ենք միասին խոսել, քննարկել, ունենալով տարաձայնություններ, եւ դա մեր լեզվի հարուստ բառապաշարով»,-ասաց նա :
Գոհար ՀԱԿՈԲՅԱՆ
