Ռոսսելխոզնադզորը մտահոգված է Հայաստանից Ռուսաստան բուսական արտադրանքի մատակարարման խախտումների աճող թվի կապակցությամբ, տեղեկանում ենք գործակալության հայտարարությունից։
«Կտրված ծաղիկները դասակարգվում են որպես բարձր ֆիտոսանիտարական ռիսկ ունեցող կարանտինային ապրանքներ։ Կարանտինային վնասատուների ներթափանցումը, տարածումը և ակլիմատիզացիան կարող են լուրջ սպառնալիք ներկայացնել Ռուսաստանի տարածքի ֆիտոսանիտարական բարեկեցության համար, այդ թվում՝ զարգացող ներքին ծաղկաբուծության համար։
2025 թվականին Հայաստանից կտրված ծաղիկների ներմուծումը կտրուկ աճել է։ Այսպիսով, այս տարվա սկզբից ի վեր ստուգվել է 52 միլիոն հատ, ինչը 49.7%-ով ավելի է, քան 2024 թվականի նույն ժամանակահատվածում, երբ ներմուծվել էր 34.7 միլիոն հատ։
Բեռնափոխադրումների աճի ֆոնին գրանցվել է Եվրասիական տնտեսական միության անդամ երկրների համար կարանտինային օբյեկտների հայտնաբերման թվի աճ։ Ռոսսելխոզնադզորի տարածքային բաժինների կողմից անցկացված կարանտինային ֆիտոսանիտարական վերահսկողության արդյունքների համաձայն՝ հայտնաբերվել է արևմտյան ծաղկային թրիպսներով (Frankliniella occidentalis Pergande) ծաղիկների վարակման 13 դեպք։
Կարդացեք նաև
Բացի այդ, բազմիցս գրանցվել են կարանտինային օբյեկտների հայտնաբերման դեպքեր այլ տեսակի բուսական արտադրանքներում, ինչը վկայում է Հայաստանի կողմից արտահանվող արտադրանքի վերահսկողության անարդյունավետ համակարգի մասին։
Կարանտինային օբյեկտների հայտնաբերման համակարգված փաստերի հաշվառմամբ՝ Ռոսսելխոզնադզորը լուրջ մտահոգություն է հայտնում։ Ռուսաստանում կարանտինային բուսասանիտարական իրավիճակի վատթարացումը կանխելու համար նամակ է ուղարկվել Հայաստանի սննդամթերքի անվտանգության տեսչական մամնին՝ խնդրելով համապարփակ միջոցառումներ ձեռնարկել և ուժեղացնել մատակարարվող ապրանքների նկատմամբ վերահսկողությունը։
Արձագանքման նհրաժեշտ միջոցառումների բացակայության և կարանտինային օբյեկտների հայտնաբերման շարունակականության դեպքում՝ Ռոսսելխոզնադզորը ստիպված կլինի 2025 թվականի հունիսի 16-ից ժամանակավոր սահմանափակումներ մտցնել Ռուսաստան ծաղկային արտադրանքի ներմուծման վրա»,- նշված է Ռոսսելխոզնադզորի հայտարարության մեջ։
