Անհետ կորածների եւ գերիների հարցով միջգերատեսչական երկու հանդիպում է տեղի ունեցել ադրբեջանական կողմի հետ․ այս մասին խորհրդարանում լրագրողների հետ ճեպազրույցում ասաց ԱԱԾ տնօրեն Արմեն Աբազյանը։
«Հանդիպման ժամանակ քննարկվել է անհետ կորածների ճակատագիրը, հնարավոր որոնողական աշխատանքներ․․․ նմանատիպ բնույթի։ Նաեւ նախնական պայմանավորվածություն է ձեռք բերվել, որպեսզի այդ աշխատանքները շարունակական լինեն։ Ես որակում եմ այդ հանդիպումը դրական»,- ասաց նա։
Գերիների վերադարձի մասով շոշափելի արդյունքների մասին լրագրողների հարցին էլ ԱԱԾ պետը պատասխանեց․ «Ես գիտեմ, որ բոլորը սպասում են։ Բոլորից շատ շահագրգռված ենք, որպեսզի օր առաջ արդյունք ունենանք։ Հիմա ես չեմ կարող ասել՝ արդյունք կունենանք վաղը, հինգ օր հետո, թե մեկ ամիս հետո, բայց արդյունք ունենալու ուղղությամբ, համոզված եղեք, որ մեր կողմից ամեն ինչ արվում է»։
Արմեն Աբազյանը չմանրամասնեց՝ որոնողական աշխատանքները ե՞րբ եւ ո՞ր տարածքներում կիրականացվեն։ Միայն ասաց, որ նախնական պայմանավորվածություն ունեն ադրբեջանական կողմի հետ՝ համատեղ որոնողական աշխատանքներ իրականացնելու համար։
Կարդացեք նաև
Լրագրողների մնացյալ հարցերը՝ Նիկոլ Փաշինյանի՝ եկեղեցականներին վերաբերվող հայտարարությունների, սրբազան հայրերին գաղտնալսելու մասին, Արմեն Աբազյանն անպատասխան թողեց եւ հեռացավ։
Նելլի ԳՐԻԳՈՐՅԱՆ
