ՌԴ նախագահի մամուլի քարտուղար Դմիտրի Պեսկովը հաստատել է, որ Ռուսաստանի ղեկավար Վլադիմիր Պուտինը իր ամերիկացի գործընկեր Դոնալդ Թրամփի հետ զրույցում ասել է, որ Մոսկվան կպատասխանի Կիևին՝ օդանավակայանների վրա հարձակումների համար, հայտնում է ՌԻԱ Նովոստին։
Հիշեցնենք՝ Վլադիմիր Պուտինի հետ զրույցից հետո ԱՄՆ նախագահ Դոնալդ Թրամփը հայտարարել է, որ Ռուսաստանի նախագահը մտադիր է արձագանքել Ուկրաինայի զինված ուժերի կողմից օդանավակայանների վրա հարձակմանը։ Նա այս մասին գրել էր Truth Social սոցիալական ցանցում։
Ուկրաինական անօդաչու թռչող սարքի հարձակումը տեղի էր ունեցել հունիսի 1-ի գիշերը:
«Այո, իսկապես», – լրագրողներին ասել է Պեսկովը՝ պատասխանելով համապատասխան հարցին։
Կարդացեք նաև
«Ռուսաստանի պատասխանը ուկրաինական հարվածներին կլինի այնպես, ինչպես զինվորականները կհամարեն նպատակահարմար: Երբ և ինչպես՝ մեր զինվորականները կհամարեն հարմար», – ընդգծել է պետության ղեկավարի մամուլի քարտուղարը։
«Իհարկե, այն փաստը, որ Կիևի ռեժիմը ձեռք է բերել ահաբեկչական ռեժիմի բոլոր հատկանիշները, ապագայում չի կարող անտեսվել Ռուսաստանի կողմից», – լրագրողներին ասել է Պեսկովը՝ պատասխանելով այն հարցին, թե արդյոք Կրեմլը թույլ է տալիս դադարեցնել Ուկրաինայի հետ շփումները Կիևից քաղաքացիական օբյեկտների վրա կրկնակի հարվածների դեպքում։
Ինչ վերաբերում է Պուտին-Թրամփ հանդիպմանը՝ դեռևս համաձայնություններ չկան:
«Հանդիպման վերաբերյալ համաձայնություն չի եղել, քանի որ պետությունների ղեկավարների միջև կա ընդհանուր համաձայնություն, որ հանդիպումն անհրաժեշտ է, բայց դա պետք է պատշաճ կերպով նախապատրաստվի։ Եվ նման նախապատրաստման զգալի արդյունքներ պետք է լինեն, որպեսզի այդ արդյունքները կարողանան գրանցվել ամենաբարձր մակարդակով», – լրագրողներին ասել է Պեսկովը։
Նրա խոսքով՝ պատժամիջոցների թեման Ռուսաստանի և Ամերիկայի առաջնորդների միջև զրույցի ընթացքում որևէ կերպ չի շոշափվել:
Թրամփն էլ Պուտինի հետ իրենց 4-րդ հեռախոսազրույցի ընթացքում «արդարացել է», թե տեղյակ չի եղել Ուկրաինայի կողմից օդանավակայաններին հարվածելու ծրագրերի մասին, հայտնում է rbc-ն:
«Ուկրաինան չի զգուշացրել ԱՄՆ-ին Ռուսաստանի ռազմական օդանավակայաններին հարվածների մասին: Դոնալդ Թրամփը ևս մեկ անգամ հաստատել է, որ ամերիկացիները նախապես տեղեկացված չեն եղել այդ մասին»,- այս մասին հայտնել է Ռուսաստանի առաջնորդի օգնական Յուրի Ուշակովը:
Միևնույն ժամանակ, CNN-ը, հղում անելով անանուն պաշտոնյայի, հաղորդել է, թե ԱՄՆ պաշտպանության նախարար Փիթ Հեգսեթը անընդհատ տեղեկացվել է Ուկրաինայի կողմից հունիսի 1-ի հարձակման ընթացքի մասին։
Ուկրաինական զինվորականները օգտագործել են անօդաչու թռչող սարքեր՝ Մուրմանսկի, Իրկուտսկի, Իվանովոյի, Ռյազանի և Ամուրի մարզերի օդանավակայանների վրա հարձակվելու համար:
Իվանովոյի, Ռյազանի և Ամուրի մարզերում բոլոր հարձակումները հետ են մղվել:
Մուրմանսկի և Իրկուտսկի մարզերում մի քանի ինքնաթիռներ հրդեհվել են, հայտնել է Պաշտպանության նախարարությունը: Հետագայում հրդեհը մարվել է: Զոհեր չեն եղել
Օդանավակայանները հարձակման են ենթարկվել Ռուսաստանի և Ուկրաինայի պատվիրակությունների Ստամբուլում հունիսի 2-ին կայացած բանակցություններից մեկ օր առաջ: Պեսկովն այդ ժամանակ հայտնել էր, որ Պուտինը միջադեպի մասին տեղեկատվություն է ստացել առցանց:
Ռուսաստանի պաշտպանության նախարարությունը օդանավակայանների վրա հարձակումները որակել է որպես ահաբեկչական գործողություններ և հայտնել է դրանց մասնակիցներից մի քանիսի ձերբակալության մասին։
