Հասարակական-քաղաքական գործիչ Էդգար Ղազարյանին ծեծի ենթարկելու գործով դատավարության այսօրվա նիստում կողմերը հանդես եկան եզրափակիչ ելույթներով:
Հանրային մեղադրողը նշեց, որ ինքը հանդես կգա կարճ ելույթով: Նա հայտարարեց, որ Էդգար Ղազարյանին հասցվել են թեթեւ մարմնական վնասվածքներ: Ըստ այդմ, նա առաջարկեց մեղադրյալներին ճանաչել մեղավոր եւ միջնորդեց կայացնել համապատասխան մեղադրական վերդիկտ:
Էդգար Ղազարյանը համաձայն չէր հանրային մեղադրողի ձեւակերպման հետ: Նրա համոզմամբ, իր հետ տեղի ունեցածը սպանության կազմակերպված փորձ է եղել, այն ունի կատարողներ, որոնք դատարանի դահլիճում են եւ կազմակերպիչներ, որոնց հայտնաբերելու համար ոչ նախաքննական մարմինը եւ ոչ էլ դատարանը, չնայած իր միջնորդություններին, քայլեր չեն ձեռնարկել: Տուժողը իր սպանությունը կազմակերպողների առումով ունի կասկածվող կոնկրետ անձանց անուններ եւ համոզված է, որ այդ ամենը կազմակերպվել է իր քաղաքական-հասարակական գործունեության պատճառով, քանի որ մինչեւ միջադեպը իր նկատմամբ բռնություն իրականացրած անձանց երբեւէ չի ճանաչել, նրանց հետ որեւէ հարաբերություն, առնչություն չի ունեցել: Ասել է թե, գործել է ուղղահայաց ենթակայության հանցավոր շղթա: Նա դատարանին միջնորդեց նախ, մեղադրյալների նկատմամբ կիրառել ավելի խիստ պատիժներ, ինչպես նաեւ պնդեց նախկինում արած իր առաջարկը՝ գործում ներգրավել նոր մեղադրանքներ:
Կարդացեք նաև
Պաշտպանվող կողմի ներկայացուցիչը ընդհանրապես հերքեց մեղադրյալների մասնակցությունը այդ բռնությանը եւ միջնորդեց կայացնել արդարացնող դատավճիռ:
Դատարանը հեռացավ խորհրդակցական սենյակ: Վճիռը կհրապարակվի հունիսի 18-ին:
Աշոտ ՀԱԿՈԲՅԱՆ
