Քաղաքական իրավունքների հայկական կենտրոնը հայտարարություն է տարածել «ՔՀԿ չափիչի» վերջին հրապարակման վերաբերյալ
ՆԳՆ-ին կենսաչափական հսկողության լիազորություն տվող նոր օրենքը մի շարք իրավունքներ է վտանգում․ միջազգային արձագանք
«ՔՀԿ չափիչը» (CSO Meter), որը գնահատում է քաղաքացիական հասարակության իրավիճակը Արևելյան գործընկերության երկրներում (այդ թվում՝ Հայաստանում), անդրադարձել է ՀՀ ՆԳՆ-ին 24/7 ռեժիմով հեռավար կենսաչափական վերահսկողության լիազորություն տվող օրենքի փոփոխությանը և դրա վերաբերյալ Քաղաքական իրավունքների հայկական կենտրոնի (ՔԻՀԿ) վերջին զեկույցին։
Ըստ հրապարակման՝ համակարգը վտանգելու է Հայաստանում անձնական կյանքի գաղտնիության, խաղաղ հավաքների ազատության իրավունքները և խտրականության արգելքը։ «ՔՀԿ չափիչն» օրենքի ընդունումը արդեն իսկ գնահատել է որպես Հայաստանում քաղաքացիական հասարակության իրավիճակի բացասական փոփոխություն, ինչն ազդելու է տարեկան գնահատականի վրա։
Հիշեցնենք, որ ՔԻՀԿ-ն առաջարկել էր օրենքը չեղյալ ճանաչել կամ հետաձգել դրա ուժի մեջ մտնելը և առկա խմբագրությամբ այն ներկայացնել ԵԱՀԿ/ԺՀՄԻԳ-ին և Վենետիկի հանձնաժողովին՝ կարծիք ստանալու նպատակով։ «ՔՀԿ չափիչի» հրապարակման մեջ նշվում է, որ ներկա տեսքով օրենքի կիրառությունը կառաջացնի զանգվածային վերահսկողության ինստիտուցիոնալիզացման վտանգ, որն անհամատեղելի է ժողովրդավարական կառավարման և օրենքի գերակայության հետ։
ՔԻՀԿ զեկույցը՝ այստեղ:
ՔՀԿ չափիչի հայտարարությունը՝ այստեղ:
«ՔՀԿ չափիչը» նախագիծ է, որի շրջանակում մշտադիտարկվում է Արևելյան գործընկերության երկրներում (այդ թվում Հայաստանում) իրավական և օրենսդրական միջավայրը և այդ միջավայրի ազդեցությունն այդ երկրների քաղհասարակությունների վրա։
Քաղաքական իրավունքների հայկական կենտրոն
