Հայտնի մտավորական Մարտիկ Գասպարյանի նախաձեռնությամբ Գորիսը հյուրընկալել էր գիտության և մշակույթի վաստակավոր գործիչների՝ Յուրի Սուվարյանին, Գուրգեն Մելիքյանին, Սամվել Մուրադյանին, Վարդան Խաչատրյանին, Արթուր Ղարագյոզյանին, Աշոտ Գևորգյանին, Նորայր Մուրադյանին և ուրիշների։ Գորիսի գիտական և ստեղծագործ մտավորականության, գրականության, արվեստի և մշակույթի ներկայացուցիչների հետ տեղի ունեցավ բովանդակալից ու երկար սպասված հանդիպում։
Հյուրերին ջերմորեն ողջունեց Գորիսի համայնքապետարանի կրթության, մշակույթի, սպորտի, երիտասարդության և սոցիալական հարցերի բաժնի պետ Արմինե Հովակիմյանը, բարձր գնահատեց նրանց ավանդը գիտության, մշակույթի զարգացման մեջ, նշեց, որ ոգևորիչ է Գորիսում նման միջոցառումների կազմակերպումը։
Գորիսի Գուսան Աշոտի անունը կրող մշակույթի տանը գրականագետ Սամվել Մուրադյանը հանգամանորեն ներկայացրեց Սյունյաց աշխարհի գեղարվեստական մեծագույն երևույթներից մեկի՝ Գուսան Աշոտի բանաստեղծական արվեստը՝ ընդգծելով լեզվական արտահայտչամիջոցներով հիանալի պատկերներ ստեղծելու նրա հմտությունը։
Աստվածաբան Վարդան Խաչատրյանը, բարձր գնահատելով հայ գրականությունը համաշխարհային արվեստի և գրականության համատեքստում, խոնարհվեց այն բոլոր մեծերի առջև, ովքեր հայի անունը մշտապես բարձր են պահում։ Իսկ ֆիզիկոս Աշոտ Գևորգյանը խոսեց երրորդ՝ քվանտային հեղափոխության մասին՝ հույս հայտնելով, որ ապագան նոր գաղափարներ ունեցող, հետազոտող երիտասարդներինն է լինելու։
Կարդացեք նաև
«Սյունյաց երկիր» թերթի գլխավոր խմբագիր Սամվել Ալեքսանյանն էլ, ողջունելով մեծավաստակ հյուրերին, ներկայացրեց այսօրվա Սյունիքի առջև ծառացած խնդիրները։
Հյուրերը Գորիսի քաղաքային գրադարանին նվիրեցին «Գուրգեն Մելիքյանի՝ Քաշաթաղի բազմազավակ ընտանիքի հիմնադրամի» կողմից հրատարակած մասնագիտական և գեղարվեստական արժեքավոր գրականություն՝ վստահեցնելով, որ այս համագործակցությունը շարունակական կլինի։ Իսկ գորիսեցի արվեստագետները հյուրերին նվիրեցին իրենց ստեղծագործություններից։
Ռուսաստանի գիտությունների ակադեմիայի գիտական խորհրդի անդամ, նվիրյալ գորիսեցի Մարտիկ Գասպարյանը, շնորհակալություն հայտնեց միջոցառման մասնակիցներին՝ հույս հայտնելով, որ մշակութային արժեքների վերագնահատմանը, նոր մարտահրավերների քննարկմանը նվիրված այս հանդիպումը նոր գաղափարների, գործնական առաջարկների հիմնաքարը կդառնա։
Գորիսի համայնքապետարան
