2024 թվականին Երեւանի բյուջեի փաստացի եկամուտները կազմել են 116 մլրդ 715 մլն դրամ կամ 103,1 տոկոս՝ բյուջեի պլանավորման նկատմամբ փաստացի կատարողական: Սեփական եկամուտները կատարվել են 113,1 տոկոսով, այսինքն՝ Երեւանի քաղաքապետարանը սեփական եկամուտները 13,1 տոկոսով ավելի է հավաքագրել, ինչը կազմել է 71 մլրդ 199 մլն դրամ: Սեփական եկամուտների փաստացի հավաքագրումը 2023 թվականի ցուցանիշից ավելի է 21 մլրդ 100 մլն դրամով: Այս մասին ասել է Երեւանի քաղաքապետ Տիգրան Ավինյանը՝ ՀՀ ԱԺ մշտական հանձնաժողովների համատեղ նիստում ներկայացնելով 2024 թվականի պետական բյուջեի համապատասխան մասի վերաբերյալ զեկույցը:
Պետական բյուջեից Երեւան քաղաքին տրամադրվող նպատակային հատկացումները՝ սուբվենցիաները, կազմել են 955 մլն դրամ, իսկ պետության կողմից ՏԻՄ-երին պատվիրակված լիազորությունների իրականացման ծախսերի ֆինանսավորման համար պետական բյուջեից ստացվող միջոցները նախատեսված 34 մլրդ դրամի փոխարեն փաստացի մուտքագրվել է 30 մլրդ դրամ:
Որոշակիորեն նվազել են նաեւ հատկացվող դոտացիաները:
2024 թվականին իրականացվել է 113,7 մլրդ դրամի ծախս, ինչը նախատեսվածի 94,5 տոկոսն է: Քաղաքապետի գնահատմամբ սա վերջին ժամանակաշրջանի համար ռեկորդային ցուցանիշ է:
Կարդացեք նաև
Տիգրան Ավինյանը մանրամասն ներկայացրել է մայրաքաղաքում կատարված աշխատանքներն ու բարեփոխումները, անդրադարձել նաեւ ընթացող ծրագրերին:
Զեկույցն ամփոփելով՝ քաղաքապետ Տիգրան Ավինյանը նշել է, որ, ընդհանուր առմամբ, գերակատարվել են սեփական եկամուտները, ինչպես նաեւ իրականացվել են ռեկորդային ծավալի աշխատանքներ:
Քաղաքապետը պատասխանել է պատգամավորների հարցերին:
Հունիսի 11-ին համատեղ նիստն անցկացրել են ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության ու ֆինանսավարկային եւ բյուջետային հարցերի մշտական հանձնաժողովները:
ԱԺ
