ԲԱՑ ՆԱՄԱԿ
ՀՀ կրթության, գիտության, մշակույթի և սպորտի նախարար
տիկին Ժաննա Անդրեասյանին
Մեծարգո Նախարար,
Կարդացեք նաև
Խորապես մտահոգված ենք Վալերի Բրյուսովի անվան պետական համալսարանի Լեզվաբանության և մանկավարժության ֆակուլտետի դեկանի ժամանակավոր պաշտոնակատար Լևոն Սարգսյանի վերջին հայտարարությամբ, որտեղ նա թույլ է տվել անընդունելի և նվաստացուցիչ արտահայտություն՝ ուսուցիչներին անվանելով «թափթփուկներ»։
Հատկապես ցավալի և անհանդուրժելի է այն փաստը, որ նման խոսքերը հնչել են մի անձի կողմից, որը ղեկավարում է հենց մանկավարժներ պատրաստող՝ ուսուցիչների ապագա սերունդներին կրթող ֆակուլտետը։ Այդ պաշտոնը ենթադրում է բարձր բարոյականություն, պատասխանատվություն և հարգանք կրթության համակարգի բոլոր օղակների նկատմամբ՝ մասնավորապես՝ դպրոցի և մանկավարժական համայնքի հանդեպ։ Այս արտահայտությունը ոչ միայն վիրավորական է կրթության ոլորտի բազմահազար նվիրյալ աշխատողների հանդեպ, այլև ստորացուցիչ է մի ամբողջ մասնագիտության, որը հանդիսանում է ազգային ինքնության, գիտելիքի փոխանցման և մշակութային զարգացման հիմնաքարը։
Մենք հավատում ենք, որ նման վերաբերմունքը որևէ կերպ չի համապատասխանում համալսարանական արժեհամակարգին, կրթական բարոյականությանը և հատկապես՝ հանրային պաշտոն զբաղեցնող անձի վարքի նորմերին։
Ուսուցիչը մեր կրթական համակարգի ողնաշարն է, և նրանց արժանապատվությանը վնասող նման արտահայտությունները չեն կարող և չպետք է անպատասխան մնան։
Հարգելի տիկին նախարար, խնդրում ենք Ձեր միջամտությունը՝
- Հայտարարության փաստացիության պաշտոնական պարզաբանման համար։
- Նման վարքի նկատմամբ համապատասխան ծառայողական վարույթի նախաձեռնման և գնահատականի համար։
- Համալսարանական միջավայրում հարգանքի և մասնագիտական արժանապատվության պահպանմանն ուղղված քայլերի խթանման համար։
Հուսով ենք, որ կրթության ոլորտի ղեկավարությունն ի զորու է պաշտպանելու ուսուցիչների պատիվն ու հեղինակությունը և կնախաձեռնի քայլեր՝ բացառելու նման անպատասխանատու վարքը բարձրագույն կրթության համակարգում։
Հարգանքով՝
Նունե Խերանյան
Էվելինա Բաբախանյան
Էլյա Մարդանյան
Անժելա Մեսրոպյան
Վ. Բրյուսովի անվան պետական համալսարանի Ռուսերենի ամբիոնի դասախոսներ
