Aravot.am-ի տեղեկություններով, հունիսի 13-ին ՀՀ Հակակոռուպցիոն կոմիտեից գրություն է ստացվել, որ մայիսի 21-ին ՀՀ ֆինանսների նախարարության գործառնական վարչություն է դիմել ՀՀ Արմավիրի մարզի ֆինանսատնտեսական վարչության աշխատակցուհին եւ հայտնել, որ մարզի մի շարք դպրոցներ՝ սոցիալական փաթեթի ծրագրի շրջանակներում՝ եռամսյակային նախահաշիվների ներմուծման հետ կապված ունեն խնդիրներ:
Ըստ նույն աղբյուրի, Ֆինանսների նախարարությունում կատարված ուսումնասիրությամբ պարզվել է, որ Մերձավանի միջնակարգ դպրոց ՊՈԱԿ-ի կողմից 3.225.800 դրամի փոխարեն համակարգ է մուտքագրվել 33.547.998.5 դրամի նախահաշիվ, որից մայիսի 21-ի դրությամբ ծախսել է 32.011.671 դրամը:
ՊՈԱԿ-ի սոցիալական փաթեթի հաշվի, հիմնական հաշվի և տարանցիկ հաշիվների շարժի ուսումնասիրության շնորհիվ պարզվել է, որ ՊՈԱԿ-ի անվամբ բացված հաշիվներից ՊՈԱԿ-ի հաշվապահ Արմինե Ավագյանի՝ առևտրային բանկերում բացված հաշիվներին փոխանցվել են գումարներ:
