Այսօր լրագրողների հետ ճեպազրույցում Նիկոլ Փաշինյանն անդրադարձավ հարցին՝ հունիսի 20-ին ի՞նչ այց է կատարելու Թուրքիա եւ ո՞ւմ հրավերով։
Նա ասաց, որ սովորաբար նման այցերի ժամանակ կողմերը համատեղ հայտարարությամբ են հանդես գալիս։ «Բայց քանի որ մեր գործընկերները մի քիչ անհամբեր են գտնվել, այո, այդպիսի պլան կա։ Այցի օրակարգի վերաբերյալ կլինի համատեղ հայտարարություն։ Ես կարող եմ ասել, որ, իրոք, այդ այցը նախատեսված է։ Եվ համատեղության պայմանավորվածությունները չխախտելու համար այցի վերաբերյալ այս պահին ընդամենը կասեմ այն, ինչ հայտնի է»,- ասաց Փաշինյանը։
Անդրադառնալով այն մտահոգություններին, որ Իրան-Իսրայել պատերազմի համատեքստում վտանգ կա Սյունիքի ուղղությամբ, այդ վտանգները գնահատվե՞լ են, Նիկոլ Փաշինյանն ասաց, որ պարբերաբար հրավիրվում է Անվտանգության խորհրդի նիստ, բայց հաղորդագրություններ չեն տարածում։ «Բայց այդ նիստերը նրա համար չեն, որ Սյունիքի հետ կախված վտանգ կա։ Ես այդ հայտարարությունները համարում եմ սադրիչ, պրովոկատիվ, ես այդ հայտարարությունները համարում եմ չհիմնավորված՝ Հայաստանի քաղաքացիների շրջանում անհանգստություն, խուճապ եւ անորոշություններ գեներացնելու առումով»,- ասաց նա։
Փաշինյանը նշեց, որ Հայաստանն ու Ադրբեջանը համաձայնեցրել են խաղաղության եւ միջպետական հարաբերությունների հաստատման մասին համաձայնագրի նախագիծը։ «Եվ, ինչպես ասել եմ, Հայաստանի ու Ադրբեջանի միջեւ նոր պատերազմ չի լինելու, լինելու է խաղաղություն»,- հավելեց նա։
Կարդացեք նաև
Ռոզա ՀՈՎՀԱՆՆԻՍՅԱՆ
