«Շատ է խոսվում այն մասին, որ մենք կորցրել ենք Լեռնային Ղարաբաղը, ես այս հարցի մասին էլ բնականաբար շատ մտածել եմ։ Եվ այստեղ էլ իմ եզրակացությունը հետեւյալն է՝ մենք ոչ թե կորցրել ենք Լեռնային Ղարաբաղը, մենք գտել ենք Հայաստանի Հանրապետությունը։ Սա է ճշմարտությունը, որովհետեւ, ինչպես նախկինում ասել ենք, ԼՂ հարցը որպես թոկ է օգտագործվել, որ ՀՀ-ն՝ որպես անկախ եւ ինքնիշխան պետություն, չկայանա։ Բայց ՀՀ-ն կայանում է եւ ՀՀ ապագայի նկատմամբ ես ավելի լավատես եմ, քան երբեւէ։ Եվ սա ոչ թե անհաջողության, այլ հաջողության պատմություն է»,- ԱԺ նիստում 2024 թվականի բյուջեի կատարողականի քննարկման ժամանակ ասաց Նիկոլ Փաշինյանը։
Նա անդրադարձավ ընդդիմադիր պատգամավորների ելույթներում հնչած մտքերին, որ տարածաշրջանում իրավիճակը լարված է, Հայաստանի վրայով բալիստիկ հրթիռներ են թռնում։ «Հայաստանի վրայով ոչ մի բալիստիկ հրթիռ չի թռնում, ընդհակառակը, Հայաստանի վրայով թռնում են օդանավեր այն քանակությամբ, որ Հայաստանի պատմության մեջ երբեք չեն թռել։ Բայց ես չեմ ուզում սա ներկայացնել որպես հաջողության պատմություն, բայց ուզում եմ ճշգրտել, որ մեր վրայով բալիստիկ հրթիռներ չեն թռնում»,- ասաց Փաշինյանը։
Նա հավելեց՝ ՀՀ-ն երբեք միջազգային իրադրություններին ու իրավիճակներին, տարածաշրջանային հնարավոր պրոբլեմներին այնքան պատրաստված չի եղել, ինչքան պատրաստված է այսօր։ «Եվ դրա ամենակարեւոր արտահայտությունն այն արտաքին հարաբերություններն են, որը մենք ունենք։ Այո, խաղաղության գործընթացի դինամիկան է Ադրբեջանի հետ, այո, Թուրքիայի հետ ակտիվ երկխոսության գործընթացն է, այո, տարբեր ուղղություններով մեր հարաբերությունների եւ վիճակի կարգավորումն է, մեր միջազգային հեղինակության աներկբա ու աննախադեպ բարձրացումը»,- հավելեց նա։
Մանրամասները՝ տեսանյութում
Կարդացեք նաև
Նիկոլ Փաշինյանն այսօր եւս իր ելույթում անդրադարձավ Հայ Առաքելական եկեղեցուն ու հոգեւորականներին։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
