«Տպավորություն չստեղծվի, որ փորձում եմ քաղաքականացնել, բայց եթե հանցագործին չեն գտնում նախորդ դեպքերի հետ կապված, սկսում եմ որոշակի ենթադրություններ անել։ Չգիտեմ՝ իրավապահ համակարգն ինչո՞վ է զբաղված․ ո՞ւմ անկողինն են մտել, դուրս չեն գալիս, ով, ում հետ է քնում, վեր կենում։ Կոնկրետ դեպքեր կան, որոնք չեն բացահայտվում, որը բերում է նոր հանցագործությունների»,- լրագրողների հետ զրույցում ասաց «Հայաստան» խմբակցության պատգամավոր Գառնիկ Դանիելյանը՝ անդրադառնալով իր մեքենայի՝ ապակիներն ու հայելիները կոտրելու դեպքին։
Պատգամավորը փաստեց՝ տարածքում առնվազն տասը տեսախցիկ կա․ «Եթե ուզենան գտնել, կգտնեն, եթե չեն ուզում գտնել, հազար պատճառաբանություն կարող են բերել․ «Բեսպրեդել է, քիչ է, որ թալանում են, մարդկանց նյութական վնաս են տալիս, հիմա էլ անցել են բարբարոսության, ջարդել-փշրելու, ավիրելու։ Գիշերը Սամվել Կարապետյանի դատին էի, տեսնում էի հարյուրավոր, հազարավոր ոստիկաններ։ Ո՞ւր է պարեկային ծառայությունը, այն մարմինները, որոնք օր ու գիշեր փողոցներում պետք է շրջեն, ապահովեն անվտանգություն։ Մարդիկ ապահով չեն ապրում։ Գողությունն ամենօրյա է դարձել, բեսպրեդելն է դարձել ամենօրյա։ Սա ինձ համար կարմիր գիծ է»։
Գառնիկ Դանիելյանը նշեց՝ մեքենայի միջից գողություն չեն արել․ «Անգամ, եթե գողություն էլ չես անում, ինչո՞ւ ես ապակին ջարդում։ Մեքենան վնասված է, մեջն ավիրված, կոնկրետ ջարդուխուրդ են արել, դա դիտենք՝ որպես գողությո՞ւն, ո՞նց սա դիտեմ՝ որպես գողություն»։
Կարդացեք նաև
Լրագրողները հետաքրքրվեցին՝ սա չի՞ կապում Նիկոլ Փաշինյանին ուղղված իր քննադատական ելույթների հետ, Գառնիկ Դանիելյանը պատասխանեց․ «Այն, որ տարբեր ելույթներից, իմ գնահատականներից հետո տարօրինակ կերպով տարբեր բաներ են կատարվում, ակնհայտ է»։
Նա նաև հիշեցրեց մի քանի ամիս առաջ իր մեքենայի կոտրելը, այրելու փորձը․ «Այսօրվա դեպքում միտում եմ տեսնում, քանի որ իմ մյուս հեռախոսը, որը մեքենայի մեջ է եղել, եկա, տեսա, որ տեղում է։ Կողային հայելին են ջարդել։ Ես նախնական գնահատականներ չեմ ուզում տալ, բայց քանի որ դեպքերը հետևյալ կերպ են զարգանում, և մեղավորները չեն բացահայտվում, որոշակի ենթադրությունների տեղիք է տալիս, որ սա կապված է նաև իմ քաղաքական գործունեության հետ»։
Գառնիկ Դանիելյանը վրդովվեց՝ հայ մարդն իր խոսքի համար է ազատազրկվում է․ «Սամվել Կարապետյանն ընդամենն ասել էր՝ սատարում է հայ առաքելական եկեղեցուն․ ո՞ւր է հիմա այդ մարդը՝ քրեակատարողական հիմնարկում։ Գողերն ամեն օր գողություն են անում, թալանում, ազատության մեջ են»։
Տաթև ՀԱՐՈՒԹՅՈՒՆՅԱՆ
